د طالبانو په واکمنۍ کې مرموزې وژنې څوک کوي؟
![taliban](https://afghannow.net/wp-content/uploads/2023/12/Taliban-780x470.jpg)
له کله نه چې طالبان په افغانستان کې د دوهم ځل لپاره واک ته رسېدلې، مرموزې وژنې هم زیاتې شوې
د دغو مرموزو وژنو اصلي قربانیان د اسلامي جمهوري دولت پخواني سرتېري او قوماندان دي، چې لومړی د پټ مخو له لوري وړل کېږي او بیا یې کورنۍ څو ورځې وروسته د هغه جسد په داسې حال کې لاسته راوړي چې د شکنجو او وهلو نښې ورباندې پاتې وي.
د مرموزو وژنو دا لړۍ د افغانستان په اکثرو ولایتونو کې دوام لري، خو په کندهار، هلمند، خوست، ننګرهار، کونړ او شمالي ولایتونو لکه پنجشیر، کاپیسا، مزار او ځینو نورو ولایتونو کې یې ګراف لوړ ښودل شوی.
په بامیانو کې تازه پېښه
د بامیان سیمهییزې سرچینې وايي، په دغه ولایت کې یو ۵۰ کلن سړی په مرموز ډول وژل شوی دی.
سرچينې د مرغومي په ٩مه تاييد کړې چې دغه سړى غلام علي نومېده او دوه شپې مخکې وژل شوى او وروسته یې جسد موندل شوی دی. د دغه سړي مړى د «غلغلې» په بازار کې موندل شوى او پر بدن يې د چاقو نښې هم ليدل کېږي.
نور ولولئ: د طالبانو په زندانونو کې د دوو مېرمنو روغتیايي وضعیت خراب دی
غلام علي د پروان ولايت د سرخپارسای ولسوالۍ اصلي اوسېدونکى و او د باميانو په بازار کې يې د لرغونو توکو پلورنځي درلود.
د دغه سړي د وژنې اصلي انګېزه لا څرګنده نه ده.
د سیمې د اوسېدونکو له لوري د طالبانو تورنول
په کومو سیمو کې چې مرموزې وژنې شوې، اوسېدونکي یې وايي چې دا کار په خپله د طالبانو ډ ډلې اړوند جنګیالي کوي او په ډېرو ولایتونو کې داسې شواهد تر لاسه شوي چې طالب جنګیالیو د قرباني کورنۍ ګواښلي او ترې غوښتي یې دي چې موضوع پټه وساتي.
په لوګر ولایت کې برهان الدین «مستعار نوم» په نوم یوه کس تایید کړه چې د ملي اردو پخوانی افسر ورور یې طالبانو په زندان کې تر شکنجو لاندې وژلی و او دومره یې جسد ورته نه سپاره تر څو چې یې ورته د راز نه افشا کولو ضمانت نه و ورکړی.
نور ولولئ: د بشري حقونو څارونکي: د طالبانو له لوري ښځینه حقوقي فعالانې شکنجه کېږي
بله ورته پېښه په خوست ولایت کې رامنځته شوي وه چې طالب جنګیالیو د جسد ورسپارلو په وخت کې ترې لیکلی ضمانت اخیستی او په ورته وخت کې یې د قرباني کس کورنۍ ددې راز په نه افشا کېدو په مرګ ګواښلي وه.
په افغانستان کې د طالبانو له بیا واکمنېدو سره سم د مرموزو وژنو پېښې اوج ته رسېدلې چې څو ځل د بښنې نړیوال سازمان او بشر حقونو هم ورباندې اندېښنې څرګندې کړي دي.