ملګرو ملتونو د طالبانو د امیر وروستۍ څرګندونې له ناهیلۍ ډکې بللي دي
![un1](https://afghannow.net/wp-content/uploads/2024/03/UN1-4-780x470.jpg)
د ملګرو ملتونو سازمان پر ښځو د سنګسار او دُرو وهلو سزاګانې پلي کول ناهیلي کوونکي بولي
د دې سازمان د سرمنشي د ویاند مرستیال فرحان حق پرون رسنیو سره خبرو دا څرګندونې مایوسوونکې وبللې، خو زیاته یې کړه؛ دوی به په افغانستان کې د ښځو د حقونو د مساوات لپاره خپلو هڅو او فشار ته دوام ورکړي.
هغه وویل:
“دا خورا ناهیلي کوونکې دي. هغه ډول چې تاسې ته معلومه ده، موږ د طالبانو د ډېرو فرمانونو لاندې له ښځو سره د ناوړه چلند په اړه په پرلهپسې توګه خپلې اندېښنې شریکې کړي او د دې فرمانونو د لغوه کېدو غوښتنه مو کړې. موږ به په دې اړه خپلو فشارونو ته دوام ورکړو او د ښځو د حقونو د برابرۍ لپاره به په افغانستان او ټولو هېوادونو کې خپلو هڅو ته دوام ورکړو. ”
دوه ورځې وړاندې د طالبانو تر کنټرول لاندې ملي ټلویزیون د طالبانو مشر ملاهبتالله ته منسوب غږ خپور کړ چې په کې هغه وايي: “په عام محضر کې به ښځې د سزا په ډول سنګسار او په دُرو ووهل شي. ”
نور ولولئ: د ښځو پر وړاندې د طالبانو ځپونکي تګلارې ګواښمنې وبلل شوې
نور ولولئ: افغان ښځې له طالبانو د دوی پر زدهکړو او کار د محدودیتونو ختمول غواړي
په دې خبرو کې ملاهبتالله، دغه راز ځان د انسانیت ژغورونکی بولي.
هغه په دې خبرو کې لویدیځ سره د تقابل او د جګړې د دوام خبرداری هم ورکوي.
د ملاهبتالله دې څرګندونو په افغانستان کې دننه او بهر هم د ډېر شمېر خلکو او د بشري حقونو د مدافع بنسټونو غبرګونونه را وپارول.
د ښځو او نجونو پر وړاندې د طالبانو چلند
د بشري حقونو بېلابېلو ملاتړو بنسټونو او د ښځو د حقونو فعالانو د ملاهبتالله دا پیغام په افغانستان کې د بشري حقونو په ځانګړي ډول د نجونو او ښځو د حقونو د نه خوندیتوب لپاره د خطر زنګ وباله.
د ملګرو ملتونو سرمنشي انټونیو ګوتیریش په خپل راپور کې چې د فبرورۍ په میاشت کې خپور شوی و د طالبانو حکومت له لوري په عام محضر کې مجازات له بشري حقونو څخه د سرغړونې په توګه یاد کړي.
خو له دې ټولو سره سره، د طالبانو حکومت واک له رسېدو وروسته؛ تر اوسه په عام محضر کې د قصاص درې پېښې عملي کړي چې په کې یې څلور تنه اعدام کړي دي.
د بشري حقونو بېلابېلو بنسټونو په افغانستان کې د طالبانو لهخوا په عام محضر کې د خلکو اعدامول بشریت ته سپکاوی بللی.
دې بنسټونو دا هم ویلي وو چې په افغانستان کې د اعدام د حکمونو د پلي کېدا پر مهال نړیوال قوانین نقض شوي دي.