د ملګرو ملتونو د سرمنشي ویاند وايي، دې غونډه کې به افغانستان کې بشري او ښځو حقونه بحث شي

هاخوا طالبانو تر اوسه د دوحې په درېیمه غونډه کې د ګډون پرېکړه نه ده کړي، خو لا هم سلا مشورې روانې دي.

دارنګه طالبانو ملګرو ملتونو ته په دې غونډه کې د ګډون په موخه شپږ شرطونه وړاندې کړي دي، چې یو هم په کې د نجونو د زده کړو او کار کولو نه بحث دی.

په راروانه دوحې ۳مه غونډه کې د بحث لومړیتوب

د ملګرو ملتونو د سرمنشي ویاند ویلي، د دوحې په غونډه کې د هېوادونو ځانګړي استازي د ګډون لپاره رابلل شوي، چې د افغانستان د وضعیت په اړه له نړۍ سره په جوړجاړیو کې د لا ډېر «وضاحت او همغږۍ» رامنځته کولو لپاره هڅې وکړي.

سټیفن دوجاریک وویل چې د بشري حقونو او ښځو د حقونو مسله د دې غونډې مهم لومړیتوب دی.

د ملګرو ملتونو د سرمنشي وياند د (غبرګولي اتمه) په يوه خبري ناسته کې وويل، چې ملګري ملتونه به له طالبانو سره خپلو خبرو ته دوام ورکړي. هغه وویل: «موږ د افغانستان له اوسنیو واکمنو سره خپلو اوسنیو اړیکو ته دوام ورکوو. ځکه هغوی اوس پر افغانستان واکمن دي.»

نور ولولئ: د افغانستان په تړاو د دوحې غونډې ته د حامد کرزي ګونګ پیغام

نور ولولئ:  طالبان د دوحې ناستې له اجنډا خبر نه لري

دوجاریک زیاته کړه چې ملګري ملتونه په پرله پسې ډول له طالبانو سره د ښځو او نجونو د حقونو موضوع راپورته کوي، هغه حقونه چې په افغانستان کې ښځې او نجونې ترې محرومې دي.

افغانستان ته د قطر د پلاوي سفر

د قطر یو پلاوي دوه ورځې وړاندې کابل ته سفر وکړ او له طالبانو یې د دوحې په ۳مه غونډه کې د ګډون بلنه ورکړه.

خو طالبانو ته نږدې سرچینو رسنیو ته ویلي و، چې طالبانو په کابل کې د ملګرو ملتونو او قطري پلاوي سره په وروستۍ ناسته کې د دوحې په ناسته کې د ګډون لپاره شپږ شرطونه ایښي وو، چې یو یې د ملګرو ملتونو له خوا په افغانستان کې د نجونو د زده‌کړو او د ښځو کار پر مسلې سترګې پټول دي.

طالبانو دغو استازو ته ویلي چې د نجونو زده‌کړې د افغانستان داخلي مسله ده او دا ډله هڅه کوي چې په دغه هېواد کې ورته زمینه برابره کړي.

ټاکل شوې چې د دوحې درېیمه غونډه د جون په ۳۰ او د جولای په لومړۍ نیټه د (چنګاښ ۱۰ او ۱۱مه) جوړه شي.

د یادونې وړ ده چې طالبانو د دوحې په دویمه غونډه کې هم له ګډون کولو ډډه کړي وه.