د بشري حقونو څار سازمان د ښځو څانګې مرستیاله وايي، ملګري ملتونه د طالبانو په خاطر خپل راپور ورکوونکي ته ارزښت نه ورکوي
هیډر بار وايي، ملګرو ملتونو ته د افغان ښځو د اوسني ناوړه وضعیت په اړه د خپل راپور ورکوونکي راپور ته ارزښت نه ورکول کېږي.
نوموړي وايي، ملګري ملتونه د افغان مېرمنو پر ناوړه وضعیت سترګې پټوي او پر ځای یې طالبانو ته ارزښت ورکوي.
د دوحې ناستې له اجنډا د ښځو مسئلې ایستل
هېدر بار د دوشنبې په ورځ په خپله اېکس پاڼه ولیکل، چې ملګرو ملتونو د دوحې په ناسته کې له اجنډا څخه د ښځو مسله اېستې ده.
د ملګرو ملتونو د بشري حقونو په برخه کې ځانګړی راپور ورکوونکی ریچارډ بېنېټ به نن سه شنبه (د غبرګولي په ۲۹مه) په افغانستان کې د بشري حقونو په اړه د دغه سازمان د بشري حقونو شورا ته خپل وروستی راپور وړاندې کړي.
نور ولولئ: هیدر بار: افغانستان کې دیني مدرسې د ښوونځیو ځای نه شي نیولی
نور ولولئ: د بشري حقونو د څار سازمان: طالبان د ښځو او نجونو په مجازات سره د بشريت ضد جرم کوي
هېدر بار ویلي:« د خواشینۍ خبره دا ده، چې په ټوله کې ملګري ملتونه د بشري حقونو د ځانګړي راپور ورکوونکي خبرو ته غوږ نه نیسي.»
د بشري حقونو د څار سازمان د ښځو د برخې مرستیاله وایي، چې د ښاغلي بېنېټ په راپور کې نه یوازې دا چې په افغانستان کې د ښځو له حقونو د ښکاره سرغړونو بېلګې رانغاړل شوې؛ بلکې هېوادونو ته یې د داسې عملي ګامونو د اوچتولو وړاندیزونه هم کړي، چې د دغو سرغړونو په برخو کې طالبان ځواب ورکولو ته اړ باسي.
طالبانو ته د ملګرو ملتونو امتیازونه
هېدر بار وایي، د طالبانو په واکمنۍ کې له بشري حقونو د دغسې پراخو سرغړونو سره، سره ملګري ملتونه غواړي هغوی ته د دوحې په درېیمه ناسته کې د بلنې تر څنګ نور امتیازونه هم ورکړي.
هغې وویل:« موږ ته مالومه شوې د هغو امتیازونو په اړه چې ملګرو ملتونو طالبانو ته په پام کې نېولي؛ نو طالبان به د دوحې په درېیمه ناسته کې ګډون کوي. په دغو امتیازونو کې د دوحې په ناسته کې د مېرمنو نه ګډون او له اجنډا څخه د ښځو او بشري حقونو د برخو اېستل شامل دي.»
د افغانستان لپاره د ملګرو ملتونو د بشري حقونو راپور ورکوونکي ریچارډ ېنېټ (د غبرګولي په ۲۳مه) په خپل تازه راپور کې وویل، په افغانستان کې جنسیتي توپیر د بشریت ضد جنایت په توګه د ښځو «د سرکوبولو او له ټولنې څخه د هغوی د حذفولو» په برخه کې ښه بېلګه ده، چې باید نړۍوال ورته پاملرنه وکړي.
