د ایراني ځواکونو قوماندان وايي، له افغانستان او پاکستان سره یې د سرحدي پولو تړل لومړیتوب دی
ایران څو ورځې وړاندې د افغانستان او ایران په ګډه پوله له ۲۶۰ زیات افغانان تیر باران کړل او ویې وژل.
تازه د ایراني رسنیو د دغه هېواد د پوله ساتو ځواکونو د قوماندان سردار احمد علي ګودرزي له قوله راپور ورکړی، چې د دغه هېواد په ختیځ او لوېدیځ کې له افغانستان او پاکستان سره د پولو تړل او دېوال جوړول یې په لومړیتوب کې دی.
په ختیځ او لویدیځ کې د پولو تړل
ایرنا خبري اژانس د یکشنبې په ورځ د (تلې ۲۹مه) په خپل یوه راپور کې د ایران د پوله ساتو ځواکونو د قوماندان سردار احمد علي ګودرزي له قوله لیکلي، چې د دغه هېواد په ختیځ او لوېدیځ کې له افغانستان او پاکستان سره په سرحدي پولو باندې د دېوال جوړولو او لارو بندولو د پلان پلي کولو موخه یې ایران ته د توکو د قاچاق، د نشهيي توکو د قاچاق او د ناقانونه کډوالو د ننوتلو مخنیوی دی.
نور ولولئ: ملګرو ملتونو د افغانستان په اړه د متحده عربي اماراتو وړاندیز شوی پرېکړه لیک تصویب کړ
نور ولولئ: امیر عبداللهیان امیر خان متقي ته ویلي: د هلمند سیند اوبو کې حقابه مو جدي غوښتنه ده
سردار علي احمد ویلي: «د نظامي چلندونو په نظر کې نیولو سره په ځانګړي توګه د نشهيي توکو د قاچاق او ناقانونه کډوالۍ په برخه کې د ایران لومړیتوب اوس له افغانستان او پاکستان سره د ایران دی، چې دغه هېواد ته شاخوا ۸۰ سلنه نشهيي توکي له همدغو دوو لارو څخه راوړل کیږي.»
د سرحدي پروژې اوږدوالی
نوموړي زیاته کړې، چې دمګړۍ د سیستان او بلوچستان په لوېدیځ کې د دیوال جوړولو عملي چارې پیل شوې دي.
دا په داسې حال کې ده، چې تېره ورځ ایراني رسنیو په شمال ختیځ کې د ایران د ځمکنیو ځواکونو د سیمه ییزې اډې د قوماندان په حواله خبر ورکړی و، چې له افغانستان سره د پولې تړلو سرحدي پروژې اوږدوالی به ۳۰۰ کیلومتره وي او د پلي کولو چارې به یې د ایران د څلورو انجنیري ډلو او د ځمکنیو ځواکونو له خوا ترسره شي.
د ایران او افغانستان تر منځ د پولې د بندولو په عملیاتو کې تر څلورو مترو پورې لوړ دیوالونه غځول شوي او د دې ترڅنګ د مصنوعي ځیرکتیا ټکنالوژي هم په کې کارول کیږي.
