ډونالډ ټرمپ د امریکا په ټاکنو کې ددغه هېواد ولسمشر شو او د نړۍ ګڼو مشرانو ورته مبارکيانو لېږلي دي
د امریکا متحدو ایالتونو په ولسمشریزو ټاکنو کې د جمهوريغوښتونکي ګوند نوماند ډونالډ ټرمپ ګټونکی شو.
اسوشیټېډپرېس چهارشنبه د نوامبر پر ۶مه، راپور ورکړی چې ټرمپ د ۲۷۷ الکټرال کالج رایو په ترلاسه کولو سره د ډيموکراټانو نوماندې کاملا هرېس پر وړاندې ګټونکی شو.
هرېس په دې ټاکنو کې ۲۲۴ الکټرال کالج رایې ترلاسه کړي دي.
د نورې نړۍ هېوادونو غبرګون
بل خوا ډونالډ ټرمپ په فلوریډا ایالت کې خپلو پلویانو ته په وینا کې ویلي چې ټول سرحدونه به وتړي.
هغه یو ځل بیا د امریکا د متحدو ایالتونو د ملي ګټو او د دغه هېواد پر کورنیو مسایلو ټینګار کړی دی.
ورته مهال، د بریټانیا لومړي وزیر کيیر سټارمر په اېکسپاڼه کې لیکلي دي: «زه په راتلونکو کلونو کې له تاسو (ټرمپ) سره په ډېرې لېوالتیا کار کولو ته په تمه یم.»
نور ولولئ: امریکا کې نن سې شنبه د ولسمشر د ټاکلو په موخه رایه اچونه کېږي
نور ولولئ: د کاملا هرېس ژوند، زده کړې او سیاست
د اوکراین ولسمشر ولادیمیر زیلینسکي هم ډونالډ ټرمپ ته د امریکا د ولسمشر په توګه د بریا مبارکي ورکړې ده.
په همدې حال کې د اسټرالیا لومړي وزیر انتوني البانیز ډونالډ ټرمپ ته د بریا مبارکي ورکړې او واشنګټن او سیډني یې غوره ملګري او رښتیني متحدان بللي دي.
هغه هیله ښودلې چې د اسټرالیا او امريکا ولسونو ترمنځ همکاري به ټينګه پاتې شي.
ایمانوېل مکرون پر اېکس پاڼه څه لیکلي
د فرانسې ولسمشر ایمانوېل مکرون په خپله اېکسپاڼه کې لیکلي: «چمتو یو لکه څنګه مو چې د تېرو څلورو کلونو په ترڅ کې همکاري کړې، بیا هم له یو بل سره کار کوو.»
بل خوا د جرمني لومړۍ وزیرې اولاف شولتز هم ټرمپ ته د امریکا په ولسمشریزو ټاکنو کې د بریا مبارکي ورکړې ده.
نوموړې ویلي چې جرمني او امریکا له ډیرې مودې راهیسې په ګډه د اتلانتیک سمندر په دواړو غاړو کې د «سولې او ازادۍ د ترویج» لپاره همکاري کړې ده.
د یادونې ده چې د امریکا جمهوريغوښتونکو د استازو جرګې د ۵۱ څوکیو په ګټلو سره د دغې جرګې اکثریت هم ترلاسه کړ.
په ورته وخت کې شنونکي وايي، چې د ډونالډ ټرمپ په ولسمشر کېدو ډېر احتمال دادی چې پر طالبانو هغه پیسې بندې شي چې هره اوونۍ د سپینې ماڼۍ لخوا دوی ته ورکوي کېږي او له بلې خوا ټرمپ ګواښ کړی و چې د ولسمشر کېدو په صورت کې به د بګرام هوايي اډه هم نیسي.
