د امریکا د استازو جرګې د افغان همکارانو د لېږد قانون د تصویب خبر ورکړ

هغه افغانان چې له امریکايي ځواکونو سره یې په افغانستان کې کار کړی، تر اوسه په افغانستان کې دي او لا امریکا ته نه دي لېږدول شوي.

د امریکا استازو جرګې غړې ډینا ټایټس له «افغان متحدینو» د ملاتړ قانون د تصویب خبر ورکړی دی.

په بیان کې چې د امریکا استازو جرګې چهارشنبه د لړم پر ۳۰مه خپور کړی، مېرمن ټېټس زیاته کړې، دا مجوز قانون د هغو افغانانو د ځای پر ځای کېدو د هڅو لپاره دی چې د متحدو ایالاتونو له ځواکونو سره یې همکاري کړې ده.

د افغانانو په لېږد کې د یاد قانون مرسته

د استازو جرګې دې غړې ویلي چې د افغانستان متحدین لا هم د طالبانو له پراخ ګواښ سره مخامخ دي او دا قانون به په امریکا کې د دوی د کډوالۍ او مېشتېدو له بهیر ملاتړ وکړي.

هغې ویلي دي: په ۲۰۲۴ کال کې د مجوز قانون (CARE) تصویب هغو کسانو د ساتنې لپاره د متحدو ایالاتو د دولت پر ژمنې ټینګار کوي چې په افغانستان کې یې د ۲۰ کلن ماموریت په ترڅ کې زموږ د پرسونل ترڅنګ خدمت کړی دی.»

نور ولولئ: اروپايي ټولنه: له پاکستانه راغلو افغان کډوالو سره ۶۱ میلیونه یورو مرسته کوو

نور ولولئ: ایران: ۵۷۴ افغان بندیان به کابل ته وسپاري

په بیان کې راغلي چې د امریکا د بهرنیو چارو وزارت په ۲۰۲۴ کال کې د «افغانانو د بیا ځای پر ځای کېدو هڅو همغږي کولو» په نوم یو ځانګړی دفتر جوړ کړی او اوس نوی قانون د افغانانو د تخلیې او مېشتېدو بهیر اسانه کړی دی.

نوي قانون د امریکا د بهرنیو چارو وزارت ته د راتلونکو درېیو کلونو لپاره د افغانانو د ملاتړ مهم واکونه ورکړي دي.

د یاد قانون له مخې د مالي سرچینو اسانه کول

دا قانون د خدماتو قراردادونو ته اجازه ورکوي او د دې ماموریت لپاره د مالي سرچینو لېږد اسانوي.

هغه ټینګار وکړ چې د افغان همکارانو د ساتنې لپاره هیڅ ضرب الاجل شتون نلري او د نوي قانون په تصویب سره، امریکا به په مؤثره توګه د وړ افغانانو انتقال وکړي.

د یادونې وړ ده چې په ۲۰۲۲ کال کې، د امریکا د بهرنیو چارو وزارت یو ځانګړی دفتر په نوم “د افغانانو د نقل مکان هڅو همغږي کوونکی” د دې لپاره جوړ کړ چې د افغانستان او پاکستان څخه متحده ایالاتو ته د وړ افغانانو د انتقال بهیر ساده او همغږي کړي.

نوی قانون دې دفتر ته اجازه ورکوي چې درې کاله کار وکړي.

دا په داسې حال کې ده چې د مخکېني دولت زرګونه امنیتي ځواکونه چې له امریکا سره یې همکاري کړې وه، په افغانستان کې د طالبانو له قوي ګواښونو سره مخامخ دي.