یو ایراني چارواکي ویلي چې په ایران کې د بهرنیو محصلان ډېری برخه عراق او افغانستان جوړوي
درې کاله وړاندې پر افغانستان د طالبانو له بیا واکمنېدو سره دغه ډلې د نجونو زده کوونکو پر مخ د زده کړو دروازې وتړلې چې له همدې امله زیاتې کورنۍ پر بچو د تعلیم لپاره له افغانستانه وکوچېدې او نورو هېوادونو ته یې مخه کړه.
د ایران د علومو، څېړنو او ټکنالوژۍ بنسټ د غیرایراني محصلانو د قونسلۍ برخې مسوول فرید رحیمي نداف ویلي چې په دغه هېواد ډېری نړیوال زدهکړیالان د افغانستان او عراق دي.
د بهرني محصلانو لپاره د ۱۶۰ پوهنتونونو اجازه
د ایرنا خبري اژانس د راپور په حواله، نداف یکشنبه د لیندۍ پر ۱۱مه ویلي چې دا مهال د ایران ۱۶۰ پوهنتونونه د بهرنیو محصلانو د نوملیکنې اجازه لري.
نوموړي زیاته کړې چې د افغان او عراقي محصلانو سربېره د دغه هېواد په پوهنتونونو کې د پاکستان، هند، لبنان، سوریې، اروپا، روسیې، چین او افریقايي هېوادونو محصلان هم زدهکړې کوي.
هغه ویلي چې نړیوال زدهکړیالان له ۱۰ یا ۱۲ ځانګړو پوهنځیو پرته په بلې هرې څانګې کې زدهکړې کولای شي.
نور ولولئ: ایرانی پلاوی کابل ته تللی او د بندیانو د تبادلې په خاطر له طالبانو سره ګوري
نور ولولئ: تېرو ۲۴ ساعتونو کې له ایران او پاکستان د ۳۵۰ کورنیو راستنېدل
نوموړي «نړیوالو محصلانو ته د نوملیکنې د اسانتیا کړنلارې» ته په اشارې زیاته کړې چې د دغه پلان له مخې باید د ۱۴۰۷ کال تر پایه د نړیوالو زدهکړیالانو شمېر ۳۲۰ زرو کسانو ته لوړ شي.
د سیمې له هېوادونو سره د ایران اړیکې
دغه ایراني چارواکي یادونه کړې چې بهرني فارغان کولای شي د ایران او خپلو هېوادونو ترمنځ د سیاسي، اقتصادي او کلتوري اړیکو په پياوړتیا کې مهم رول ولوبوي.
په ایران کې ځينې افغانان بیا په دغه هېواد کې د زدهکړو له فرصتونو برخمن دي. په دغه هېواد کې له تعلیمي فرصتونو څخه د ګټې اخیستنې لپاره پاسپورت او د یو ډول تحصیلي کارت لرل اړین دي.
په ۱۴۰۱ کال کې د ایران د علومو، څیړنو او ټکنالوژۍ وزارت د محصلینو سازمان په یو خپاره کړي لیک کې ویلي و، هغه بهرني وګړي چې تعلیمي کارت لري، تر هغو چې خپل کارت په پاسپورت بدل نه کړي، د دغه هېواد په پوهنتونونو کې نوملیکنه اجازه نه لري.
