نړیوال بانک وايي، په افغانستان کې د خوراکي توکو ناامني یا خوندیتوب د تېرو لسیزو په پرتله د لا خرابېدو لور ته تللی دی.
یاد بانک وايي چې سره له دې چې د هند په ګډون په څو هېوادونو کې نسبي کمښت راغلی، خو په افغانستان او پاکستان کې د خوراکي توکو امنیت او خوندیتوب د تېرو لسیزو په پرتله خراب شوی او ناوړه وضعیت یې خپل کړی دی.
دا بانک په نړیوال اقتصادي لید راپور کې زیاته کړې چې د معلوماتو د نشتوالي له امله، د افغانستان لپاره د اقتصادي ودې وړاندوینې نه وړاندې کېږي. خو سره له دې، د دې بانک په وینا، تمه کېږي چې د افغانستان اقتصاد به په یوه محدوده اندازه وده وکړي چې یوه برخه یې د نسبي تورم د کمښت له امله ملاتړ کیږي.
د نړیوال بانک په راپور کې په دې هېواد کې د فقر د زیاتوالي ته هم اشاره شوي ده.
وړاندې په راپور کې راغلي: “سره له دې، د بیکارۍ کچه به لا هم لوړ پاتې شي، د خوراکي موادو ناخوندیتوب په پراخه کچه اټکل کیږي، او سرانه عاید به ثابت پاتې شي چې دا به د فقر زیاتوالي ته لار هواره کړي.”
د خپاره شوي راپور په وینا، په ټیټ عاید لرونکو هېوادونو کې د تاوتریخوالي له امله اقتصادي وضعیت نور هم خرابېږي.
