د طالبانو د حکومت مشرتابه ملا هبة الله اخندزاده د یوه فرمان له مخې د افغانستان له زندانونو ۵۶۱۵ زندانیان له بندخونو آزاد او د بند موده کمه شوه.
د طالبانو د حکومت سترې محکمې ویلي، چې دا حکم د کوچني اختر په مناسبت ورکول شوی دی.
د دې حکم له مخې به ۲۴۶۳ بندیان آزاد او د ۳۱۵۲ بندیانو د بند موده کمه شي.
په اعلامیه کې راغلي، چې د بندیانو د خوشې کولو کړنلاره د طالبانو د سترې محکمې د تفتیش ریاست، زندانیانو چارو سمون ادارې، کورنیو چارو وزارت او استخباراتو ریاست طالب استازو د پلاوي له لوري ملا هبت الله ته وړاندې شوې ده.
سرچینې د خوشې کېدونکو او د هغو بندیانو چې د بند موده کې یې تخفیف راغلی، د جرمونو په تړاو څه نه دي ویلي.
دا په داسې حال کې ده چې تر دې وړاندې د طالبانو د بهرنیو چارو وزارت ویلي وو، چې د روژې میاشتې په مناسبت یې د متحده عربي اماراتو سره د ۵۴ افغان بندیانو د خوشې کولو هوکړه هم کړې ده.
