اړوند خبرونه:
عباس عراقچي: د افغان کډوالو د ستنېدو بهير به تدريجي وي
علیرضا بیګدلي: ایران کې افغان کډوال د دې هېواد په اقتصادي پرمختګ کې مهم رول لري
ملګري ملتونه: تېرو ۲ورځو کې نږدې ۹زره افغان کډوال له پاکستانه ایستل شوي
د طالبانو د کډوالو او بېرته راستنېدونکو چارو وزارت وایي، یوازې په تېرو ۲ ورځو کې له پاکستاني زندانونو ۵۳۲ تنه افغان کډوال ازاد او بېرته هېواد ته راستانه شوي دي. دا اقدام د هغو زرګونه افغانانو د برخلیک یوه برخه ده، چې پاکستان کې د قانوني اسنادو نهلرلو له امله نیول شوي او یا له هېواده په زور ایستل شوي دي.
دوې ورځې، درې سلنه زیاتوالی
د طالبانو د سرحدي چارو د آمریت له وینا سره سم، پرون دوشنبه (غویي ۲۹مه) له پاکستانه ۲۸۶ تنه کډوال راخوشې او د کندهار له لارې افغانستان ته داخل شوي دي. همداراز، تېره یکشنبه (غویي ۲۸مه) د ورته لړۍ په دوام ۲۴۶ تنه نور افغانان له پاکستاني بندخونو ازاد او بېرته هېواد ته جبري ستانه شول.
د دغو تازه ازاد شویو کډوالو تر ټولو لویه ستونزه دا وه چې دوی قانوني اسناد نهلرل، او همدا لامل و چې پاکستاني چارواکو هغوی نیولي وو. چارواکي وایي، راخوشې شوې ډلې کې ښځې، ماشومان او عمر خوړلي کسان هم شامل دي.
د کډوالۍ ناورین ته دوام
د طالبانو د کډوالو وزارت وایي، د ۲۰۲۳ کال له وروستیو راهیسې چې پاکستان د افغان کډوالو د جبري شړلو نوې پالیسي جوړه کړې، شاوخوا ۵۰۰ زره افغانان بېرته افغانستان ته تلو ته اړ شوي دي. د دغې بهیر پر مهال زرګونه افغانان هم نیول شوي وو، چې له ډلې یې لسګونه زره لا هم د قانوني اسنادو د نهشتون له امله د پاکستان په زندانونو کې شپې او ورځې تېروي.
راستنېدونکي افغانان له بل ناورین سره مخ دي
که څه هم د دغو کډوالو راخوشې کول یوه مثبته هڅه بلل کېږي، خو هغه څه چې اندېښنې زیاتوي، دا دي چې بېرته راستنېدونکي افغانان په خپله خاوره کې هم له سخت وضعیت سره مخ دي.
راپورونه ښيي چې ډېری راستانه شوي کډوال:
د سرپناه نشتون سره مخ دي
روغتیايي خدماتو ته لاسرسی نهلري
اقتصادي وضعیت یې نازک دی
د بیا میشتېدو لپاره اساسي امکانات نهلري
سربېره پر دې، د طالبانو د حکومت د امکاناتو محدودتیا او نړیوال بندیزونه دا وضعیت نور هم ستونزمن کړی دی.
