اړوند خبرونه:
د طالبانو اعلامیه: د هند او پاکستان تر منځ زیاتېدونکی کړکېچ د اندېښنې وړ دی
هند پر پاکستان د «سندور» عملیات پیل او ۹ سیمې یې په نښه کړي
کشمیر کې د تاوتریخوالي له امله، له هند سره د افغانستان سوداګري په ټپه ودرېده
اسلام اباد: “هند به په راتلونکو څو ساعتونو کې پر پاکستان برید وکړي”
امیر خان متقي وايي، رسمیت پېژندنه د فشار په توګه کارول کېږي
د طالبانو جشن او د خلکو خپګان
پر افغانستان د طالبانو د بیا واکمنېدو په څلورمه کلیزه کې، د دې ډلې مشران د “سرتاسري امنیت، شرعي نظام او له فساده د خلکو د خلاصون” خبرې کوي. د طالبانو ځواکونو د ۲۰۲۵ کال د اګست په ۱۵مه په غزني کې د یو لړ مراسمو په ترڅ کې په سړکونو د سکېټ حرکات ترسره کړل. په ټولنیزو رسنیو کې خپرو شویو ویډیوګانو کې ښکاري چې طالبان په موټرسایکلونو او رنجر موټرو کې، چې د پخواني حکومت څخه پاتې دي، د “فتحې” ترانې غږوي او جشن نیسي. خو د دې په مقابل کې، د کابل او نورو ښارونو په کوڅو کې خلک د کار په لټه کې په غمجنو څېرو سرګردان وو.
له شکر ایستلو تر تسلیت پورې
د طالبانو مشر، هبت الله اخندزاده، کابل ته د خپلې ډلې د بیا ننوتلو د کلیزې په مناسبت په یوه پیغام کې ویلي، چې افغانستان د اشغال له پای ته رسېدو وروسته، د “شرعي” نظام خاوند شو. هغه زیاته کړه چې په ټول هېواد کې امنیت تامین شوی او خلک باید د طالبانو د حکومت په جوړېدو شکر وباسي. اخندزاده همدارنګه د “اسلامي امارت” چارواکو ته امر کړی چې د وزیرانو او کابینې د غړو لپاره د “سرپرست” له کلمې څخه کار وانخلي.
دې پرېکړې ته په غبرګون کې، د “افغانستان د ازادۍ جبهې” د رسنیو مسؤل، داوود ناجي، دا د تعامل د منتظرو په زړه د خلاصون ګوزار بللی دی. د ملي امنیت پخواني سلاکار، رنګین دادفر سپنتا، د اګست ۱۵مه د افغانستان په تاریخ کې تر ټولو توره ورځ وبلله او ویې ویل چې دا څلور کاله د خلکو لپاره د ظلم او ورانۍ له پېړیو سره برابر وو.
د کابل د جګړو “ترخه” تجربه
د افغانستان د ازادۍ جبهې مشر، یاسین ضیا ویلي، چې د کابل په شمال کې مېشتو “د متحدې ملي جبهې ځواکونو” په لومړیو میاشتو کې د پلازمېنې د بېرته نیولو توان درلود، خو په کابل کې د ښاري جګړې د اندېښنو او د منظمو پوځي او اداري جوړښتونو د نشتوالي له امله یې له دې کاره ډډه وکړه. نوموړي پر ځینو سیاسي ډلو نیوکه وکړه چې له طالبانو سره یې د خپلو مالونو او شتمنیو د ساتلو لپاره معامله کړې ده.
د طالبانو ضد جبهې قومندان: اوس د عمل وخت دی
د طالبانو ضد “مقاومت جبهې” یوه لوړپوړي قومندان، خالد امیري، په یوه اعلامیه کې ټینګار کړی چې افغانستان د ترهګرو په اشغال کې دی او خلک له بېوزلۍ، ځپلو او کډوالۍ ستړي شوي دي. هغه زیاته کړه: “له طالبانو سره مبارزه همغږي او هدفمند اقدام ته اړتیا لري. هره ورځ ځنډ د دښمن د پیاوړتیا او زموږ د کمزورتیا په مانا ده.
د طالبانو په واکمنۍ کې د بېوزلۍ او تاوتریخوالي کیسه
د امریکا د بهرنیو چارو وزارت د اګست په ۱۲مه د افغانستان د بشري حقونو د وضعیت په اړه په خپل کلني راپور کې ویلي، چې د طالبانو ځپونکی نظام د ښځو او نجونو په وړاندې د پراخ او سیستماتیک چلند له لارې پلی کېږي، چې د بشریت ضد جنایت په توګه ګڼل کېدای شي. راپور زیاتوي چې په پنجشېر، کندز، کابل، غزني، فاریاب او هرات په څېر ولایتونو کې د پخواني حکومت د چارواکو او امنیتي ځواکونو خپل سري او غچ اخیستونکي وژنې شوي دي.
د ملګرو ملتونو د اسنادو له مخې، په ۲۰۲۳ کال کې لږ تر لږه ۳۴۲ هلکان د طالبانو له خوا جذب شوي، چې ۱۵۰ یې په جګړو کې کارول شوي دي. د یونیسف د راپور له مخې، ۳۹ سلنه افغان مېرمنې له ۱۸ کلنۍ مخکې واده شوې دي. د ملګرو ملتونو د بشري حقونو کارپوهانو له نړیوالې ټولنې غوښتي چې د طالبانو حکومت په رسمیت ونه پېژني.
