اړوند خبرونه:
د ای سي ای لخوا د طالبانو پرضد د پخوانیو افغان سیاستوالو د کارولو نوي هڅه
م.م. کې د امریکا سفیره وايي، امریکا طالبان په رسمیت نه پیژني
ذبیح الله مجاهد: پخواني سیاستوال د ای ایس ای په مرسته بیا واک ته نه شي راتللی
د روسیې ولسمشر ولادیمیر پوتین اعلان کړی چې هېواد يې له طالبانو سره د ترهګرۍ او مخدره موادو پر وړاندې مبارزه کې بشپړه همکاري کوي.
دا څرګندونې د دوشنبې په ورځ د تاجکستان په پلازمېنه دوشنبې کې د روسیې او منځنۍ آسیا د هېوادونو په ګډه غونډه کې وشوې.
پوتین د افغانستان پر امنیتي وضعیت خبرې وکړې او وويل چې مسکو د طالبانو له حکومت سره د ترهګرۍ او نشهيي توکو د قاچاق پر وړاندې مبارزه کې بشپړ ملاتړ کوي.
پوتین زياته کړه: “موږ وينو چې د افغانستان اوسني چارواکي د ترهګرۍ او مخدرو موادو پر وړاندې د ګډې مبارزې په ګډون، په بېلابېلو برخو کې همکارۍ ته چمتو دي. روسیه په کلکه د دغو هڅو ملاتړ کوي.”
روسیه: ا.ا به امریکا ته اجازه ورنکړي چې د بګرام اډې ته بېرته راشي
هغه دې ته هم اشاره وکړه چې د افغانستان وضعیت تل د منځنۍ آسیا هېوادونو لپاره د اندېښنې وړ موضوع پاتې شوې او د سیمهييزې همکارۍ پیاوړتیا د ګډو امنیتي ګواښونو پر وړاندې ډېره مهمه ده.
پوتین د داعش خراسان څانګې او نورو افراطي ډلو د شتون او فعالیت په اړه خپله ځانګړې اندېښنه څرګنده کړه او ټینګار يې وکړ چې د دې ګواښونو د مخنيوي لپاره ګډ سیمهييز عمل ضروري دی.
دا څرګندونې وروسته له هغه کېږي چې پوتین ځانګړي استازي ضمیر کابلوف ويلي و چې د افغانستان اوسني افراطي ډلې د لوېدیځ د پوځي مداخلې محصول دي او د طالبانو حکومت د روسیې د نړیوال تروریزم پر وړاندې د جګړې ملګری بلل کېږي.
روسیې د روان ۲۰۲۵ کال د چنګاښ (جولای) په ۱۲مه نېټه په يوه بې ساري اقدام کې د طالبانو حکومت په رسميت وپېژانده او د هغوی د نوي سفير د استوګنې اسناد يې ومنل. دا پرېکړه د طالبانو له ۲۰۲۱ کال راهیسې د واک ته رسېدو وروسته، د دوی د نړیوال مشروعیت په لور یو مهم ګام بلل کېږي.
