اړوند خبر:
خواجه اصف: که د ترکیې مذاکرات ناکام شي، له افغانستان سره مخامخ جګړې ته رادانګې
د طالبانو د بهرنیو چارو وزارت د پاکستان د لومړي وزیر مرستیال او د بهرنیو چارو وزیر، اسحاق ډار وروستۍ څرګندونې ناسمې او له حقیقت لرې وبللې.
په دې تړاو خپره شوې خبرپاڼه کې راغلي، چې د امیرخان متقي اسحاق ډار سره په یوه ورځ کې شپږ ځلې ټیلیفوني اړیکه نه ده نیولې او دا اړیکه د تفاهم او همغږۍ په چوکاټ کې ترسره شوې وه.
طالبانو ویلي، چې په لومړۍ اړیکه کې اسحاق ډار ځان له وضعیت ناخبره وښود او د دویم تماس غوښتنه یې وکړه، چې د دواړو ترمنځ خبرې بیا وشوې.
خبرپاڼې زیاته کړې، چې یوه ورځ وروسته بیا د اسحاق ډار له لوري د اړیکې هڅه وشوه، خو د بېلابېلو لاملونو له امله دا اړیکه عملي نه شوه.
اسحاق ډار: پاکستان د کابل سقوط پر مهال هلته د ای ایس ای مشر د «چای څښلو» درنه بیه پرې کوي
طالبانو لاملونه نه دي روښانه کړي چې څه وو.
تر دې وړاندې د پاکستان بهرنیو چارو وزیر او د شهباز شریف مرستیال، اسحاق ډار سنا ته په خبرو کې ویلي وو، چې تېره دوشنبه ورته امیرخان متقي شپږ زنګونه وهلي دي.
ډار ویلي وو، چې دا اړیکې د استانبول د دویم پړاو مذاکراتو له پیلېدو وړاندې شوې وې او هغه ورته څرګنده کړې وه چې افغان خاوره یې باید پر ضد ونه کارېږي.
طالبان وايي، د هېوادونو اړیکې باید د متقابل احترام او پر واقعیت ولاړ تعامل پر بنسټ وي او دا «ناسمې» څرګندونې یې دیپلوماتیک تعامل له روحیې سره په ټکر کې بللې دي.
ټاکل شوې، چې سبا د نومبر په ۶مه په استانبول کې د طالبانو او پاکستان ترمنځ د مذاکراتو دویم پړاو پیل شي او پر ګډو اندېښنو خبرې او هوکړې وکړي.
