منظور پښتین وایي چې ۲۰۲۵ کال پر پښتنو “ډېر زیانمن او ویرجن” تېر شو. په دې راپور کې په پښتونخوا کې د پوځي عملیاتو، هدفي وژنو، او د پښتون ژغورنې غورځنګ د غړو د نیول کېدو په اړه د پښتین بشپړ پیغام ولولئ.
خیبر پښتونخوا – د پښتون ژغورنې غورځنګ (PTM) مشر منظور احمد پښتین د ۲۰۲۵ کال د پای ته رسېدو په مناسبت په یوه ویډیويي پیغام کې ویلي، چې دغه کال د پښتنو لپاره له درد، وېر او درنو انساني تلفاتو ډک و. پښتین په خپلو خبرو کې تېر کال د پښتنو په تاریخ کې یو له تر ټولو سختو کلونو څخه یاد کړ.
په ۲۰۲۵ کال کې پر پښتنو شوي بریدونه او عملیات
منظور پښتین په خپل پیغام کې د پښتونخوا په بېلابېلو سیمو کې د ۲۰۲۵ کال په اوږدو کې د پوځي عملیاتو، چاودنو او هدفي وژنو یادونه وکړه. هغه وویل چې په تېر کال کې ډېری پښتانه ملي شخصیتونه لکه مفتي منیر شاکر او مولانا خانزیب شهیدان کړل شول.
د پښتین په وینا، د پښتونخوا غرنۍ سیمې په ځانګړي ډول تیراه، چارمنګ، میرعلي او جانيخېل د “ډالري جګړې” قرباني شوې او نږدې هره ورځ د ډرون بریدونو، هاوانونو او مخامخ ډزو لاندې وې. هغه زیاته کړه چې په ۲۰۲۵ کال کې نه یوازې د پښتونخوا اوسېدونکي، بلکې افغان کډوال هم په زور له پاکستانه وایستل شول او په افغانستان کې پر ولسي سیمو هوايي بمبارۍ وشوې.
۲۰۲۵ کال د پښتون ژغورنې غورځنګ (PTM) قربانۍ
منظور پښتین د خپل غورځنګ لپاره هم ۲۰۲۵ کال خورا ستونزمن وباله. هغه وویل چې د کال پیل د روح الله، محمود او ریاض په غمجنې شهادت سره وشو او د کال تر پایه پورې د غورځنګ مهم مشران لکه علي وزیر او حاجي عبدالصمد په زندانونو کې پاتې شول.
نوموړي د هغو ملګرو نومونه هم واخیستل چې د پاکستاني ادارو لخوا لادرکه شوي دي:
نورالله ترین او حنیف پښتین
عدنان، حبیب او ګوهر
فرمان او عرفان
پښتین ټینګار وکړ چې د دغو فشارونو، چاپو او نیونو سره سره، د غورځنګ غړو د پاکستاني ریاست له ظالمانه تګلارو سره غاړه نه ده ایښې او خپله سوله ییزه مبارزه یې ژوندۍ ساتلې ده.
د پاکستاني ریاست پر ضد تورونه
د پيټياېم مشر په ښکاره ډول د پاکستان حکومت او پوځ تورن کړل چې پر پښتنو دا ټولې ناخوالې د دوی د “ظالمانه تګلارو” پایله ده. هغه وویل چې ریاست غواړي د پښتنو پر خاوره د خپلو ګټو لپاره جګړه توده وساتي.
د پاکستان حکومت غبرګون
که څه هم د پاکستان حکومت د منظور پښتین د دغو تازه څرګندونو په اړه تر اوسه رسمي غبرګون نه دی ښودلی، خو په تېر کې یې تل دغه ډول څرګندونې رد کړې دي. د پاکستان پوځ ادعا کوي چې په پښتونخوا کې د دوی عملیات له “ترهګرۍ سره د مبارزې” په موخه دي او د پيټياېم غړي د ریاست پر ضد د ولس په پارولو تورنوي.
د منظور پښتین له نظره، ۲۰۲۵ کال د پښتنو د ځپلو کال و، خو هغه په خپل پیغام کې یو ځل بیا د پښتنو پر یووالي ټینګار وکړ او ژمنه یې وکړه چې د حق غوښتنې دا غږ به په راتلونکي کې نور هم پیاوړی کړي.
