د ازبکستان جیولوژیکي شرکت په رسمي ډول په بلخ ولایت کې د دریو نفتي حوزو سروې پیل کړه. دغه پروژه د احمد اباد، شمر او محمدجان ډګر په بلاکونو کې د انرژۍ زیرمې لټوي.
د افغانستان او ازبکستان ترمنځ د اقتصادي او تخنیکي همکاریو په لړ کې، د ازبکستان د کانونو او جیولوژۍ وزارت خبر ورکړی چې د دغه هېواد د جیولوژۍ شرکت په افغان-تاجک نفتي پوله کې د دریو نفتي حوزو سروې په عملي ډول پیل کړې ده. دغه لویه پروژه د افغانستان د کانونو او پټرولیم سکټور د پراختیا لپاره یو مهم ګام بلل کېږي.
د سروې ځای او نفتي بلاکونه
د رسمي معلوماتو له مخې، د دریو نفتي حوزو سروې د بلخ ولایت په دریو مهمو بلاکونو کې روانه ده. په دې کې د محمدجان ډګر، شمر او احمداباد نفتي بلاکونه شامل دي. ازبکستاني متخصصین هڅه کوي چې په دې سیمو کې نه یوازې د هایدروکاربني (نفت او ګاز) سرچینې تثبیت کړي، بلکې د اوسپنې او مسو د احتمالي کانونو موندلو لپاره هم جدي پلټنې ترسره کړي.
د دغو بلاکونو مساحت په لاندې ډول ښودل شوی دی:
محمد جان ډګر بلاک: ۳۶۰۸ کیلومتره مربع.
شمر بلاک: ۲۱۵۴ کیلومتره مربع.
احمد اباد بلاک: ۱۸۵۵ کیلومتره مربع.
د پرانیستې مراسم او ډیپلوماټیک ملاتړ
د دغې پروژې د رسمي پرانیستې مراسم د تېرې سې شنبې په ورځ په بلخ ولایت کې ترسره شول. په دغو مراسمو کې د بلخ ولایت د اقتصادي چارو مرستیال والي مولوي نورالهدی ابو ادریس او د ازبکستاني شرکت عمومي رییس خایتبوی اومونوف ګډون کړی و.
ازبکستاني شرکت د کانونو او پټرولیم وزارت سره له اوږدو خبرو اترو وروسته د سپړنې او د دریو نفتي حوزو سروې جواز ترلاسه کړی دی. د کانونو وزارت د هایدروکاربن برخې رییس، عبدالخلیل حنفي وویل چې دا فعالیتونه به د افغانستان د ملي عوایدو په زیاتوالي کې خورا مثبت رول ولوبوي.
د تړون مخینه او د همکاریو پراختیا
