له تاجکستانه د افغان کډوالو شړل لا هم دوام لري او د تازه راپورونو له مخې، تېره شپه ۱۱۰ افغان کډوال له دوشنبه ښار او د وحدت ښارګوټي له سیمو څخه افغانستان ته ایستل شوي دي.
ویل کېږي چې دغه کډوال د کندوز ولایت له لارې هېواد ته ستانه کړل شوي دي. تر اوسه د تاجکستان حکومت د دغو جبري ایستنو په اړه رسمي څرګندونې نه دي کړې. له تاجکستانه د افغان کډوالو شړل
په تاجکستان کې د افغان کډوالو اندېښنې زیاتې شوې
په وروستیو اوونیو کې د تاجکستان له بېلابېلو سیمو، په ځانګړي ډول د وحدت ښار او جبار رسولوف ولسوالۍ څخه د افغان کډوالو د ایستلو راپورونه زیات شوي دي.
په تاجکستان کې مېشت یو شمېر افغان کډوال اندېښنه لري چې د یوې تاجکستانۍ ښځې تر وژل کېدو وروسته، چې تور یې پر یوه افغان لګېدلی، د افغان پناه غوښتونکو پر وړاندې فشارونه زیات شوي دي.
د دوی په وینا، د یوې انفرادي پېښې له امله ټولې کډوالې کورنۍ له ستونزو او نامعلوم برخلیک سره مخ شوې دي.
د افغان کډوالو د کمېټې غوښتنه
په همدې حال کې، په تاجکستان کې د افغان کډوالو یوې کمېټې له کورنیو غوښتي چې د قوانینو او ټولنیزو اصولو رعایت ته جدي پاملرنه وکړي.
په هغه پیغام کې چې د رسنیو له لارې خپور شوی، ویل شوي چې ځینې ناسم چلندونه د کوربه ټولنې د نارضایتۍ لامل ګرځي او پایله یې پر ټولو کډوالو اغېز کوي.
کمېټې له افغان کورنیو غوښتي چې د خپلو ماشومانو روزنې، د ټولنیزو اصولو درناوي او د کوربه هېواد د قوانینو مراعات ته پاملرنه زیاته کړي.
له تاجکستانه د افغان کډوالو شړل او د راتلونکې اندېښنې
د کډوالو اړوند بنسټونه وایي، په تاجکستان کې ډېری افغان پناه غوښتونکي د نامعلوم راتلونکي له اندېښنو سره مخ دي، ځکه د جبري ایستلو لړۍ ورځ تر بلې پراخېږي.
له تاجکستانه د افغان کډوالو شړل داسې مهال دوام لري چې ګڼ افغانان د امنیتي، اقتصادي او بشري ستونزو له امله نورو هېوادونو ته د پناه وړلو هڅه کوي.
