پر ايراني کښتیو د امریکا برید؛ د امریکا مرکزي قوماندانۍ (سنټکام) ویلي چې د فارس خلیج په سیمه کې یې د ایران اړوند دوې کښتۍ په نښه کړې دي. دغه اعلان وروسته له هغه شوی چې د ایران د بندر عباس ښار او شاوخوا سیمو کې د چاودنو راپورونه خپاره شول.
د سنټکام په خبرپاڼه کې راغلي چې پر ايراني کښتیو د امریکا برید هغه مهال ترسره شو چې یادو کښتیو د سمندري ماینونو د ځای پر ځای کولو هڅه کوله. د امریکا پوځ ادعا کړې چې دا عملیات “دفاعي اقدام” و.
امریکايي ځواکونو همداراز ویلي چې د ایران د توغندیو یو مرکز یې هم په نښه کړی، خو د دغو بریدونو د احتمالي زیانونو او تلفاتو په اړه تر اوسه جزییات نه دي خپاره شوي.
د ایران او امریکا اړیکې لا هم ترینګلې دي
بلخوا ایراني چارواکو تر دې دمه د امریکا د دغو ادعاوو په اړه رسمي غبرګون نه دی ښودلی، خو په سیمه کې د وروستیو پوځي تحرکاتو له امله د تاوتریخوالي د زیاتېدو اندېښنې پراخې شوې دي.
پر ايراني کښتیو د امریکا برید داسې مهال کېږي چې د واشنګټن او تهران ترمنځ د سولې او اټومي تفاهم په تړاو غیرمستقیمې خبرې روانې دي. دواړو لورو په وروستیو اوونیو کې د احتمالي هوکړې په اړه محتاط دریځ خپل کړی دی.
ټرمپ او سپاه پاسداران یو بل ته خبرداری ورکړی
د امریکا ولسمشر ډونالډ ټرمپ یو ځل بیا خبرداری ورکړی چې که ایران د واشنګټن غوښتنو ته غاړه کښېنږدي، نو له سختو پوځي اقداماتو سره به مخ شي. بلخوا د ایران سپاه پاسداران هم ویلي چې هر ډول برید ته به “قاطع ځواب” ورکړي.
کارپوهان وایي، د فارس خلیج وروستي پوځي تحرکات ښيي چې د امریکا او ایران ترمنځ وضعیت لا هم نازک دی او هره کوچنۍ پېښه کولی شي د سیمې امنیتي وضعیت نور هم ترینګلی کړي.
