د کرکټ نړۍ ته مهم خبر؛ افغانستان به د لومړي ځل لپاره د هند پر وړاندې د شل اوریزو لوبو کوربهتوب وکړي
د کرکټ نړۍ ته مهم خبر؛ هندي رسنیو راپور ورکړی چې د افغانستان او هند د کرکټ ملي لوبډلو ترمنځ به د روان کال په سپټمبر میاشت کې د درېیو نړیوالو شل اوریزو سیالیو لړۍ ترسره شي؛ هغه لړۍ چې د افغانستان په نوم به کوربهتوب ولري.
د هندي رسنۍ «ټایمز اف انډیا» د راپور له مخې، ټاکل شوې دغه درې شل اوریزې لوبې د سپټمبر په ۱۳مه، ۱۶مه او ۱۹مه نېټه ترسره شي.
د راپور له مخې، که دا لړۍ رسمي بڼه خپله کړي، نو دا به لومړی ځل وي چې افغانستان د هند پر وړاندې د نړیوالو شل اوریزو سیالیو د یوې بشپړې لوبلړۍ کوربهتوب کوي، که څه هم سیالۍ به د هند په پلازمېنه نوي ډیلي کې ترسره کېږي.
د کرکټ نړۍ پام د افغانستان او هند احتمالي لوبلړۍ ته
د کرکټ نړۍ شنونکي باور لري چې د افغانستان او هند ترمنځ هره لوبه د مینهوالو لپاره ځانګړی ارزښت لري، ځکه دواړه لوبډلې په وروستیو کلونو کې د اسیا له مهمو کرکټي ځواکمنو لوبډلو څخه ګڼل کېږي.
افغانستان که څه هم د امنیتي او تخنیکي محدودیتونو له امله لا هم په خپل هېواد کې د ډېری نړیوالو لوبو کوربهتوب نه شي کولای، خو له کلونو راهیسې یې هند د کورنیو لوبو لپاره یو له مهمو کوربه هېوادونو څخه پاتې شوی دی.
دواړه کرکټ بورډونه لا هم چوپ دي
سره له دې چې هندي رسنیو د یادې لوبلړۍ د ترسره کېدو خبر ورکړی، خو د افغانستان او هند کرکټ بورډونو تر اوسه په رسمي ډول په دې اړه څه نه دي ویلي.
د کرکټ نړۍ یو شمېر څارونکي وایي چې د دواړو بورډونو رسمي اعلان به د لوبو د نېټو، ځای او نورو جزییاتو په اړه وروستی وضاحت رامنځته کړي.
افغانستان اوس هم په هند کې سیالیو ته چمتووالی نیسي
افغان ملي لوبډله دا مهال په هند کې د خپلو راتلونکو سیالیو لپاره چمتووالی نیسي. ټاکل شوې افغان لوبډله د جون په شپږمه نېټه د هند پر وړاندې یوازینۍ ټېسټ لوبه ترسره کړي.
له دې وروسته به د دواړو هېوادونو ترمنځ د جون له ۱۳مې تر ۲۰مې پورې درې نړیوالې یو ورځنۍ سیالۍ هم ترسره شي.
شنونکي باور لري چې که د سپټمبر شل اوریزه لوبلړۍ رسمي شي، نو دا به د افغانستان او هند ترمنځ د کرکټي اړیکو د پراختیا او د دواړو لوبډلو د سیالیو د کچې د لوړولو لپاره یو مهم ګام وي.
