شپږیزه لیګ؛ د افغانستان د کرکټ ستر کورنی ټورنمنټ نن په خوست کې پیلېږي
د افغانستان کرکټ بورډ اعلان کړی چې د شپږیزه لیګ یوولسم پړاو نن چهارشنبه په خوست ولایت کې پیلېږي. دا لومړی ځل دی چې د افغانستان د کرکټ دغه ستر کورنی ټورنمنټ د خوست په رحمت ولي مسرور نړیوال کرکټ لوبغالي کې ترسره کېږي.
د کرکټ بورډ په وینا، د شپږیزه لیګ سږنی پړاو به د هېواد د کورني کرکټ د پیاوړتیا او د ځوانو استعدادونو د موندلو لپاره مهم فرصت وي.
د شپږیزه لیګ لومړۍ لوبه د چا ترمنځ ده؟
د شپږیزه لیګ د پرانیستې سیالي به د تېر پړاو اتلې لوبډلې، آمو نهنګانو، او بند امیر ښامارانو ترمنځ ترسره شي.
ټاکل شوې چې دا لوبه د چهارشنبې سهار په ۹:۰۰ بجو پیل شي، او آمو نهنګان به د تېر کال د اتلولۍ د دفاع لپاره سیالیو ته ښکته شي.
کرکټ بورډ د بشپړ چمتووالي خبر ورکوي
د افغانستان کرکټ بورډ ویلي، د شپږیزه لیګ د سیالیو لپاره د رحمت ولي مسرور نړیوال کرکټ لوبغالی په بشپړ ډول چمتو شوی او د لوبغاړو، روزونکو، رسنیو او نندارچیانو لپاره لازمې اسانتیاوې برابرې شوې دي.
بورډ همدارنګه له کرکټ مینهوالو، په ځانګړي ډول د خوست له اوسېدونکو، غوښتي چې لوبغالي ته په ورتګ سره د سیالیو فضا لا رنګینه او په زړه پورې کړي.
بهرني مبصرین او نړیوال تولیدي ټیم هم ګډون لري
د کرکټ بورډ د معلوماتو له مخې، د شپږیزه لیګ د سږني پړاو د سیالیو د تبصرو لپاره یو شمېر بهرني مبصرین هم رابلل شوي دي.
همدارنګه، د سیالیو تلویزیوني تولید او نشرات یوه نړیوال تولیدي ټیم ته سپارل شوي، څو د ټورنمنټ خپرونې د نړیوالو معیارونو له مخې ترسره شي.
پنځه لوبډلې د اتلولۍ لپاره سیالي کوي
د شپږیزه لیګ په یوولسم پړاو کې پنځه لوبډلې د اتلولۍ لپاره سیالي کوي. تمه کېږي چې د دې ټورنمنټ په ترڅ کې به یو شمېر ځوان لوبغاړي خپل استعدادونه وښيي او د افغانستان د ملي کرکټ لوبډلې لپاره به د راتلونکو انتخابونو فرصت هم برابر شي.
شپږیزه لیګ د افغانستان د کرکټ تر ټولو مهم کورنی ټورنمنټ ګڼل کېږي او هر کال د هېواد د غوره لوبغاړو ترڅنګ د نویو استعدادونو د راڅرګندېدو لپاره مهمه زمینه برابروي. د کرکټ شنونکي باور لري چې د سږني پړاو بریالی ترسره کېدل به د کورني کرکټ د ودې او د افغانستان د کرکټ د راتلونکي لپاره هم مهم ګام وي.
