ایکس بانکي خدمات؛ د ایلن مسک د هر اړخیز اپ ستر ګام

د ایکس بانکي خدمات په رسمي ډول په امریکا کې پیل شول او ورسره د ایلن مسک هغه پلان یو بل مهم پړاو ته ورسېد چې غواړي ایکس (پخوانی ټویټر) په یوه هر اړخیز اپلېکېشن (Everything App) بدل کړي. د شرکت د نوي مالي خدمت X Money له لارې د Premium او Premium Plus کاروونکي کولی شي د اپلېکېشن له پرېښودو پرته پیسې ولېږي، ترلاسه یې کړي، بیلونه پرې کړي او له بېلابېلو مالي اسانتیاوو ګټه واخلي.

د ایکس بانکي خدمات څه اسانتیاوې لري؟

د ایکس د معلوماتو له مخې، دغه خدمت د جولای له ۲۸مې د امریکا وړ کاروونکو ته فعال شوی دی. کاروونکي کولای شي یو بل ته پرته له لېږد فیس پیسې واستوي. همدارنګه د بانکي وایر لېږد، د بیلونو تادیه او نور مالي خدمات هم د همدې پلاتفورم له لارې ترسره کېږي.

شرکت د ویزه ډیبیټ کارت هم معرفي کړی، چې د عادي بانکي کارت په څېر کارول کېږي. د دې نوښت موخه دا ده چې کاروونکي د بانکي چارو لپاره بېل اپلېکېشن ته اړتیا ونه لري.

د کاروونکو د پیسو خوندیتوب

د شرکت په وینا، د کاروونکو زیرمې به د امریکا په یوه FDIC پورې تړلي بانک کې ساتل کېږي، چې د نافذو مقرراتو له مخې به وړ زیرمې خوندي وي. سربېره پر دې، هغه کاروونکي چې شرایط پوره کړي، د خپلو وړ زیرمو پر پیسو به تر ۶ سلنه کلنۍ ګټې (APY) هم برخمن شي.

د ډیجیټلي تادیاتو په بازار کې نوې سیالي

کارپوهان باور لري چې د ایکس بانکي خدمات به د ډیجیټلي تادیاتو په بازار کې د پام وړ بدلون رامنځته کړي. د دوی په اند، X Money کولی شي د Venmo، Cash App او نورو فین‌ټېک شرکتونو لپاره جدي سیالي رامنځته کړي.

د ایلن مسک هدف دا دی چې ایکس یوازې د ټولنیزو رسنیو پلاتفورم نه وي، بلکې داسې یو Everything App شي چې پکې پیغامونه، ویډیوګانې، تادیات او نور مالي خدمات ټول په یوه ځای کې وړاندې کېږي. که د ایکس بانکي خدمات په نړیواله کچه هم پراخ شي، تمه کېږي چې د انلاین مالي خدمتونو په بازار کې به د پام وړ بدلونونه راولي.