د امریکا په سنا کې د افغانانو ټي پي ایس یا د موقت خونديتوب حالت لپاره نوې لایحه معرفي شوې ده. د لایحې د ملاتړو په وینا، دا اقدام په امریکا کې مېشتو هغو افغانانو ته د لنډمهاله قانوني خوندیتوب زمینه برابرولی شي چې د افغانستان د اوسني وضعیت له امله د بېرته ستنېدو له خطر سره مخ دي.
لایحه د پنجشنبې په ورځ، د اګست په ۶مه، د امریکا د مشرانو جرګې یو شمېر دیموکراتو او جمهوري غوښتونکو سناتورانو له لوري وړاندې شوې ده.
د افغانانو ټي پي ایس لایحه څه ورکوي؟
د «افغان ایوک» سازمان د معلوماتو له مخې، که دا لایحه تصویب شي، افغانستان به د ۲۰۲۹ کال د جولای تر لومړۍ نېټې پورې د موقت خونديتوب حالت یا TPS تر پوښښ لاندې راشي.
د دې طرحې له مخې، هغه ارزول شوي افغانان چې لا دمخه په امریکا کې مېشت دي، کولی شي له اخراج څخه لنډمهاله قانوني خوندیتوب ترلاسه کړي او د کار اجازه یې بېرته فعاله شي.
دا لایحه لا نه ده تصویب شوې او تر اوسه یوازې د سنا په کچه وړاندې شوې ده.
د افغانانو لپاره د لایحې ملاتړ
د «افغان ایوک» مشر او بنسټايښودونکي شان وانډایور د دې اقدام هرکلی کړی او ویلي یې دي چې سازمان یې د هغو سناتورانو ملاتړ کوي چې د امریکا د پخوانیو افغان متحدینو د ساتنې لپاره یې ګام اخیستی دی. د افغانانو ټي پي ایس
وانډایور ویلي چې د دوی سازمان پر دواړو امریکايي سیاسي ګوندونو نیوکې کوي او هڅه کوي د افغانانو د ستونزو په اړه د دواړو ګوندونو له استازو سره کار وکړي.
د افغانانو د کډوالۍ بهیر له ستونزو سره مخ دی
د ډونالډ ټرمپ د ولسمشرۍ د دویمې دورې له پیل وروسته د امریکا د کډوالۍ په سیاستونو کې د پام وړ بدلونونه رامنځته شوي دي. د راپورونو له مخې، د کډوالو د بیا مېشتېدو ځینې پروګرامونه ودرول شوي او وروسته د افغان پاسپورټ لرونکو لپاره د سفر محدودیتونه هم ولګېدل. د افغانانو ټي پي ایس
د دغو بدلونونو له امله په امریکا کې د مېشتو او د کډوالۍ د پروګرامونو له لارې د تلو په تمه افغانانو په اړه اندېښنې زیاتې شوې دي.
له ۱۷۵ زرو ډېر افغانان د SIV په بهیر کې
د امریکايي رسنیو د راپورونو له مخې، له ۱۷۵ زرو ډېرو افغانانو په افغانستان کې د امریکا د «ماموریت د مشر» تایید ترلاسه کړی دی. دا تایید د ځانګړې کډوالۍ ویزې یا SIV د غوښتنلیک له مهمو پړاوونو څخه ګڼل کېږي. د افغانانو ټي پي ایس
د «افغان ایوک» د مشر په وینا، د دغو کسانو یوه برخه امنیتي او اداري ارزونې بشپړې کړې، خو لا هم د ویزې د مرکې او نورو پړاوونو په تمه ده.
د امریکا د بهرنیو چارو وزارت له غوښتونکو غوښتي چې خپلې ټاکل شوې مرکې ترسره کړي، خو د افغانانو د ملاتړ ځینې سازمانونه د اوسنیو سفري محدودیتونو له امله د دې پروسې په اړه اندېښمن دي.
که د افغانانو ټي پي ایس لایحه په سنا او وروسته په کانګرېس کې تصویب شي، په امریکا کې مېشتو افغانانو ته به د موقت قانوني خوندیتوب او د کار کولو د حق په برخه کې مهم بدلون رامنځته کړي.
