د افغانستان پخواني ولسمشر حامد کرزي د د خپلواکۍ ورځ د ۱۰۷مې کلیزې په مناسبت افغانانو ته مبارکي ویلې او ټینګار یې کړی چې د هېواد اصلي ځواک په تلپاتې سولې، ملي یووالي او په علم او پوهه سمبال نسل کې نغښتی دی.
کرزي په خپل پیغام کې ویلي چې خپلواکي ترلاسه کول د افغانانو د مبارزې او قربانیو مهمه پایله وه، خو د خپلواک هېواد ساتنه هغه وخت ممکنه ده چې افغانستان په خپلو پښو ولاړ، متحد او له علمي پلوه پیاوړی وي.
د خپلواکۍ د ورځې په مناسبت پر زده کړو ټینګار
هغه ویلي، د افغانستان د بشري ځواک د پیاوړتیا لپاره باید د هېواد ټولو ماشومانو ته، نجونو او هلکانو ته، د زدهکړو او تحصیل زمینه برابره شي. د هغه په وینا، ملي یووالی هم هغه وخت ټینګېږي چې د خلکو ترمنځ د ګډ مالکیت احساس او د ګډ برخلیک باور پیاوړی شي.
کرزي ټینګار کړی چې افغانستان یوازې د ملي انسجام، سولې او ځواکمنتیا له لارې کولای شي د خپلواکۍ ورځ له ارزښتونو څخه په عملي ډول ګټه واخلي او د پرمختګ پر لور ګام واخلي.
د ډاکټر عبدالله عبدالله غوښتنه
په همدې حال کې، د ملي مصالحې عالي شورا پخواني مشر عبدالله عبدالله هم د د خپلواکۍ ورځ په مناسبت د افغانانو د مبارزو او قربانیو یادونه کړې او ویلي یې دي چې د خپلواکۍ نمانځنه د هغو کسانو د سرښندنو درناوی دی چې د هېواد د ازادۍ او خپلواکۍ لپاره یې مبارزه کړې ده.
د افغانستان د خپلواکۍ ورځ هر کال د اسد په ۲۸مه نمانځل کېږي. افغانستان په ۱۹۱۹ میلادي کال کې، د درېیم افغان ـ انګرېز جګړې له پای ته رسېدو وروسته، خپله خپلواکي ترلاسه کړه.
د خپلواکۍ ورځ د افغانانو لپاره یوازې یوه تاریخي مناسبت نه، بلکې د ملي یووالي، خپلواک تصمیم او د هېواد د راتلونکي د پیاوړتیا پیغام هم ګڼل کېږي.
