کندهار کې دوه سترې پروژې د ۵۵ میلیونه ډالرو په ټولیزه خصوصي پانګونه پیلېږي چې یوه یې د درملو د تولید فابریکه او بله یې استوګنیزه او سوداګریزه ودانۍ ده.
د کندهار په عینو مېنه ښارګوټي کې د «سالم فارما» په نوم د درملو د تولید فابریکې د جوړولو چارې د ۳۰ میلیونه ډالرو په پانګونه پیل شوې دي.
په همدې سیمه کې د «شاهانه ټاور» په نوم د ۲۷ پوړیزې ودانۍ د جوړولو کار هم د ۲۵ میلیونه ډالرو په خصوصي پانګونه پیل شوی دی.
کندهار کې دوه سترې پروژې د خصوصي سکټور په پانګونه
د معلوماتو له مخې، د دغو دواړو پروژو د پیل مراسم د طالبانو د ریاستالوزرا اقتصادي مرستیال عبدالغني برادر، د کندهار د والي او یو شمېر سیمهییزو چارواکو په حضور کې ترسره شوي دي.
برادر ویلي چې دغه پروژې کولی شي د اقتصادي، سوداګریزو او ښاري فعالیتونو په پراختیا کې ونډه ولري. نوموړي زیاته کړې چې د طالبانو اداره د خصوصي سکټور له پانګونې ملاتړ کوي.
کندهار کې دوه سترې پروژې؛ صنعتکاران د برېښنا غوښتنه کوي
د کندهار د صنعتکارانو د اتحادیې مشر سید سرور اماني د «سالم فارما» فابریکې د پیل په مراسمو کې د صنعت سکټور پر ستونزو خبرې کړې دي.
اماني ویلي، په هرات کې د برېښنا د ښه لاسرسي له امله شاوخوا ۱،۵۰۰ فابریکې فعالې دي، خو په کندهار کې د موجودو ظرفیتونو سربېره د فعالو فابریکو شمېر شاوخوا ۳۰۰ دی.
هغه له طالبانو غوښتي چې صنعتي فابریکو ته ارزانه او دوامداره برېښنا برابره کړي او د جوازونو د صادرولو، ځمکو ته د لاسرسي او اداري خنډونو د کمولو په برخو کې پانګهوالو ته اسانتیاوې زیاتې کړي.
