د صنعتي رباټونو نړیوال بازار؛ فابریکو کې یې شمېر له ۵ میلیونو واوښت
د صنعتي رباټونو نړیوال بازار په چټکۍ د پراخېدو په حال کې دی؛ په ۲۰۲۵ کال کې په نړیوالو فابریکو کې د فعالو رباټونو شمېر له پنځو میلیونو واوښت او چین د نړۍ تر ټولو لوی بازار پاتې شو.
په داسې حال کې چې رباټونه د نړۍ په فابریکو کې ورځ تر بلې د انسانانو ډېر کارونه پر غاړه اخلي، تازه شمېرې ښيي چې ۲۰۲۵ کال د صنعتي رباټونو لپاره د پام وړ کال و.
د رباټیک نړیوال فدراسیون د «نړیوال رباټیک ۲۰۲۶» راپور له مخې، تېر کال د نړۍ په فابریکو کې د فعالو صنعتي رباټونو شمېر شاوخوا پنځو میلیونو ته رسېدلی، چې د تېر کال پرتله ۹ سلنه زیاتوالی ښيي.
په یوه کال کې تر ۶۰۰ زره ډېر نوي رباټونه
راپور ښيي چې یوازې په ۲۰۲۵ کال کې د نړۍ په بېلابېلو فابریکو کې له ۶۰۰ زرو ډېر نوي صنعتي رباټونه نصب شوي دي.
دا شمېر د تېر کال په پرتله ۱۱ سلنه زیاتوالی ښيي او څرګندوي چې د صنعتي رباټونو نړیوال بازار په تولیدي صنعتونو کې په چټکۍ د پراخېدو په حال کې دی.
صنعتي رباټونه په فابریکو کې د تولید، راټولولو، ویلډینګ، بستهبندۍ او نورو تکراري چارو د ترسره کولو لپاره کارول کېږي. د اتومات ټکنالوژۍ پراختیا د دې لامل شوې چې ګڼ تولیدي شرکتونه پر رباټونو خپله تکیه زیاته کړي.
چین د نړۍ تر ټولو لوی بازار دی
چین په ۲۰۲۵ کال کې د صنعتي رباټونو په برخه کې تر ټولو لوی نړیوال بازار و. په دغه هېواد کې ۳۵۴ زره نوي رباټونه نصب شوي، چې د نړۍ د ټولو نویو نصب شویو صنعتي رباټونو ۵۹ سلنه جوړوي.
له چین وروسته امریکا او جاپان د صنعتي رباټونو په برخه کې لوی بازارونه وو.
د چین دا لویه ونډه ښيي چې د صنعتي رباټونو نړیوال بازار تر ډېره د اسیا د تولیدي صنعتونو له ودې سره تړلی دی، په ځانګړي ډول چین د اتومات تولید په برخه کې پراخه پانګونه کوي.
د نویو رباټونو د نصب چټکه وده دا هم څرګندوي چې نړیوالې فابریکې په تدریجي ډول د لا ډېر اتومات تولید پر لور روانې دي.
که دا بهیر دوام وکړي، د صنعتي رباټونو نړیوال بازار به په راتلونکو کلونو کې د تولیدي صنعت، مصنوعي ځیرکتیا او اتومات ټکنالوژۍ د پراختیا له مهمو برخو څخه وي.
