د ښځو نیول کېدل په کابل او هرات کې د ملګرو ملتونو د مرستندویه پلاوي یا یوناما اندېښنې راپارولې دي. یوناما وايي، د ۲۰۲۶ کال له جولای تر سپتمبر پورې لږ تر لږه ۵۲ ښځې او یوه نجلۍ نیول شوې یا توقیف شوې دي.
یوناما په خپله اعلامیه کې ویلي، ښايي د دغو پېښو اصلي شمېر تر ثبت شوي رقم لوړ وي، ځکه د امنیتي اندېښنو او ټولنیزې بدنامۍ له امله ځینې پېښې نه راپور کېږي.
د ملګرو ملتونو دغه ماموریت وايي، یو شمېر نورې ښځې د نیولو له ګواښونو سره هم مخ شوې دي.
د ښځو نیول کېدل؛ یوناما د پېښو د زیاتوالي اندېښنه لري
د یوناما په وینا، دغه نیونې تر ډېره د طالبانو د حکومت له لوري د ښځو لپاره د ټاکل شویو جامو او حجاب له مقرراتو سره تړاو لري.
په اعلامیه کې ویل شوي، د چادرۍ نه اغوستل، د ویښتانو ښکاره کېدل، د رنګینو ټیکریو اغوستل، سینګار او له محرم پرته په عامه ځایونو کې حضور د ځینو نیونو د لاملونو په توګه ثبت شوي دي. د ښځو نیول کېدل
یوناما وايي، د ښځو نیول کېدل په ځینو مواردو کې له لفظي ځورونې، ګواښونو او وهلو ټکولو سره هم مل وو. د ښځینه دوکاندارانو اړوند پېښې هم ثبت شوې دي.
د راپور له مخې، نیول شوې ښځې تر څو ساعتونو توقیف وروسته خوشې شوې دي.
یوناما د ښځو د حقونو د درناوي غوښتنه کوي
یوناما وايي، دغه اقدامات د ښځو او نجونو پر تګ راتګ، فردي ازادۍ او خپلواکو پرېکړو اغېز کوي او د ټولنیزې بدنامۍ او لا زیاتې ګوښه کېدو خطر ورسره زیاتېږي.
دغه ماموریت له طالبانو غوښتي چې د ښځو او نجونو پر وړاندې تبعیضي مقررات پای ته ورسوي او د افغانستان نړیوالو بشري حقونو ژمنو ته درناوی وکړي.
طالبانو د یوناما دغې تازه اعلامیې ته غبرګون نه دی ښودلی. دوی تر دې وړاندې ویلي چې د ښځو حقونه یې د اسلامي شریعت په چوکاټ کې تأمین کړي دي.
