د هېواد ملي اتلانو خپل ځواک نندارې ته وړاندې کړ

امریکا له افغان طالبانو سره د سولې تړون تر لاسلیکولو وروسته له افغانستان د خپلو ځواکونو وتل پیل کړل. د دې تړون له مخې امریکا په ۱۳۵ ورځو کې افغانستان کې د خپلو ۱۲ زرو سرتېرو شمېر کموي او ۸۶۰۰ ته یې ټیټوي.

له افغانستان د امریکايي پوځ وتل د طالبانو او واشنګټن ترمنځ د ۲۹ فبرورۍ د تاریخي تړون یو شرط دی.

افغان حکومت دې تړون کې برخه نه درلوده او تمه ده چې د افغانانو خپلمنځي خبرو کې ګډون وکړي.

افغان ولسمشر لومړیو کې ویلي و، له طالبانو سره د مخامخ خبرو لپاره به هغه شرط ونه مني چې له مخې یې د دې ډلې بندیان خوشي کېږي خو نوموړي د مارچ په نهمه د خپلې لوړې مراسمو کې وویل، روانه اونۍ ممکن د لږ تر لږه زر طالبانو د خوشي کولو حکم وکړي.

تېره اونۍ امریکايي پوځ هلمند ولایت کې پر افغان پوځ د طالبانو د برید ځواب کې د دې ډلې پر وسلوالو هوايي برید وکړ د طالبانو او امریکا تړون کې له دې ډلې غوښتل شوي چې تاوتریخوالی کم کړي.

وس د امریکايي پوځ ویاند ډګروال سوني لیګټ د امریکايي پوځ وتل اعلان کړل

د ډګروال لیګټ په خبره، امریکا به له افغانستان د خپلو سرتېرو اېستلو سره سره د خپلو ټولو موخو د ترلاسولو لپاره ټول پوځي وسایل او چارې په ځای وساتي.

که طالبان پر هوکړه ودرېږي، نو امريکايي او ناټو ځواکونه به څوارلسو مياشتو کې له افغانستان بشپړ ووځي.

د دې تړون له مخې، طالبان نه یواځې له بریدونو ډډه کوي، بلکې القاعده یا نورو توندلارو ډلو ته د خپلې ولکې سیمه کې د فعالیت اجازه هم نه ور کوي.

امریکا د ۲۰۰۱ کال د سپټمبر له پېښو وروسته پر افغانستان برید وکړ او طالبان یې بې واکه کړل، خو دا ډله وروسته پر یوه سرخوږي بدله شوه او پر ۲۰۱۸ کال ور سره امریکا خبرې پیل کړې.

افغان جګړه د امریکا تر ټولو اوږده جګړه ده او تر ۲۴۰۰ ډېر پوځیان یې پکې وژل شوي دي.

له افغانستان د امریکايي پوځ د وتلو د اعلان په ورځ پر افغان ولسمشر محمد اشرف غني سربېره اجرایه مشر عبدالله عبدالله هم ځان ته د لوړې مراسم جوړ کړي و.

د ټاکنو کمېسون تېرو ولسمشرۍ ټاکنو کې ولسمشر غني بریالی اعلان کړی، خو عبدالله عبدالله دا نتیجه کوټه یا جعلي بولي.

د کارپوهانو په خبره، د دې نوې سیاسي بې ټیکاوۍ له امله د افغانانو خپل منځي خبرو کې د حکومت دریځ ډېر بد اغېزمنېږي.

امریکا له اشرف غني د ولسمشر په توګه ملاتړ او د موازي حکومت له جوړېدو سره مخالفت کړی دی.

د امریکا د بهرنیو چارو وزیر مایک پمپیو د دوشنبې په ورځ یوه بیان کې وویل، چې یو حکومت او یو موټی افغانستان د دغه هېواد د راتلونکي په تېره د سولې د موخو لپاره مهم دی.