اسرائیلو ویلي چې دغه بریدونو د ایران پر نظامي اهدافو شوي دي
د اسرائيل دفاعي ځواکونو (ایډياېف) اعلان کړی، چې د ایران لخوا یې پر دغه هېواد د روانې میاشتې د توغندیو برید په ځواب کې ایران پر “پوځي اهدافو دقیق ګوزارونه” کړي دي.
د ایران دولتي رسنۍ وايي، تهران کې د چاودنو اورېدل شوي غږونه د دفاعي سیستمونو لخوا د توغندیو د شنډولو وو.
هممهاله د ایران د هوايي چلن سازمان اعلان کړی، چې ټولې الوتنې یې تر ثاني امره لغوه کړې دي.
سپینې ماڼۍ ویلي، له ولسمشر جو بایډن سره د اسرائیل د برید جزییات شریک شوي او دا چې امریکايي ځواکونه پکې ونډه نه لري.
پر اسرائیلو د ایران په ګډون په ۷ جبهو کې بریدونه
د ایډياېف لخوا پر اېکس یوه خپاره شوي بیان کې راغلي، “د ایران رژیم او په سیمه کې د هغه نیابتي ډلې د اکتوبر له اوومې راهیسې پر اسرائیلو باندې پرله پسې بریدونه کوي – په اوو جبهو کې – د ایران له خاورې د مستقیمو بریدونو په ګډون”.
په دغه بیان کې زیاته شوې، “د اسراییل دولت د نړۍ د بل هر خپلواک هېواد په څېر حق او دنده لري چې ځواب ووايي”.
نور ولولئ: سپینه ماڼۍ اسرائیلو ته د توغندیو ضد پرمختللی تاد سیسټم ورکوي
نور ولولئ: اسرائیل: په دمشق کې مو د حزب الله مالي مسئول وژلی
نور ولولئ: لبنان کې د اسرائیلو په برید کې ۲ خبریالان وژل شوي
اسرائیلي ځواکونه وايي، “دفاعي او یرغلیزې وړتیاوې” یې په بشپړه ډول چمتو دي او دا چې د اسرائیلو دولت او خلکو دفاع لپاره به “هر هغه څه وکړي چې اړتیا” یې وي.
اسرائیل د اکتوبر لومړۍ نېټه پر دغه هېواد ایران لخوا د لسګونو بالېستیک توغندیو په وسیله له برید وروسته ګواښ کړی چې غچ اخلي.
پر ایران سربېره سوریې هم ویلي، چې اسرائیلي ځواکونو پر ځايي وخت د شپې ۲ بجې د دغه هېواد سویلي او مرکزي سیمو کې پر څو پوځي اډو بریدونه کړي دي.
په عراق کې هم د بریدونو په اړه خبرداری
د سوریې دولتي خبري اژانس سانا لیکلي، دفاعي سیستمونو څو توغندي شنډ کړي او دا چې چارواکي د اوښتو زیانونو په ارزونه بوخت دي.
پر ایران او سوریې سربېره د عراق پلازمېنې بغداد ته نږدې په دیاله او صلاح الدین کې هم د اسرائيل د بریدونو خبر ورکړ شوی دی.
تر دې مخکې د خواله رسنیو یوه کارن بيبيسي ته ویلي و، چې د تهران سویل کې د “امام خمیني” هوايي ډګر له شاوخوا یې د چاودنو اورېدلي او دا چې دغه غږونه ډېر لوړ وو.
یو بل تن پر خپله پاڼه لیکلي: “سلام – د تهران خلک ۲ بجې او ۱۴ دقیقې د چاودنو د درېیو پرله پسې وحشتناکو غږونو په اورېدو راویښ شول”.
