افغانستان د سري لنکا پر وړاندې لوبه وبایلله خو محمد نبي او عضمت الله عمرزي بیا په زړه پورې لوبه وکړه

افغانستان د کرېکټ نننۍ لوبه سري لنکا ته په ۴۲ منډو وبایلله، خو د افغانستان او سري لنکا تر منځ نننۍ پنځوس اوریزه لوبه کې د افغان لوبغاړو محمد نبي او عظمت الله عمرزي خورا په زړه پورې لوبه وکړه.

دواړه لوبغاړي په داسې حال کې د لوبې لپاره د لوبې ډګر ته ووتل، چې افغانستان د ۵۵ منډو بدل کې پنځه وېکټې له لاسه ورکړې وې. دواړه افغان الروانډر بېټسمینان وتوانیدل خپلې سلیزې هم بشپړې کړې او دغه راز د ۱۳۶ منډو له جوړولو وروسته محمد نبي وسوځېد، خو دواړو لوبغاړو د ۲۴۲ منډو ملګرتیا بشپړه کړې وه.

پچه لومړۍ افغان لوبډلې وګټله

د لوبې پچه افغان لوبډلمشر حشمت الله شهیدي وګټله او لومړی یې د توپ اچونې پرېکړه وکړه. د سري لنکا د پیل توپ وهونکو ښه لوبه پیل کړه او تر ۱۸۲ منډو یې ملګرتیا ته وساتله.

اوېشکا فېرنانډو ۸۸ منډې وکړې او د فرید احمد ملک په توپ د ابراهیم ځدراڼ لخوا کېچ شو. له هغه سره پوتام نیسانکا راوتلی و چې سري لنکا د توپوهنې پاڼۍ تر پایه ودرېد او ۲۱۰ منډې یې وکړې.

نور ولولئ: کرکټ؛ د اماراتو پر وړاندې د رحمن الله ګربر جادوګره لوبه

نور ولولئ: راتلونکې میاشت کې د افغان کرکټ ملي لوبډلې لوبې

نور ولولئ: د افغانستان او سري لنکا تر منځ ټېسټ لوبه په دویمه ورځ پلازمېنه کولمبو کې پیل شوه

هغه د سري لنکا لومړنی لوبغاړی شو چې په یوه یو ورځنۍ لوبه کې دوه سلیزې کوي.

نیسانکا لومړی شري لنکايي لوبغاړی شو چې په یو ورځنۍ لوبه کې غبرګې سلیزې کوي

افغان توپ اچوونکو ۵۰ اورونو تر پایه یوازې ۲ نور شري لنکایي لوبغاړي وسوځولی شول او سري لنکا په دې توګه افغانستان ته د ۳ وېکټو په زیان د ۳۸۲ منډو ستر هدف کېښود.

اوس افغان لوبډله توپ وهنه کوي

رحمان الله ګوربز چې له ابراهیم ځدراڼ سره د پیل توپوهنې ته راوتلی و، د پرامود مادوشان لخوا په یوه منډه وسوځېد.

افغانستان لپاره د حشمت الله شهیدي په مشرۍ لوبډله کې ابراهیم ځدراڼ، رحمان الله ګوربز، رحمت شاه، اکرام عليخېل، عظمت الله عمرزی، ګلبدین نایب، محمد نبي، نور احمد لکڼوال، فضل الحق فاروقي او فرید احمد ملک لوبېږي.

د دې لوبلړۍ راتلونکې لوبه یکشنبه (د فبرورۍ ۱۱مه) او درېیمه چارشنبه د (د فبرورۍ ۱۴مه) کېږي.

افغانستان او سري لنکا تر دې مخکې یوه ټېسټ لوبه هم درلوده چې سري لنکا په لسو وېکټو وګټله.

دواړه لوبډلې د یو ورځنیو لوبو له لړۍ وروسته درې شل اوریزې لوبې هم کوي.