ایالاتو ځانګړې استازې د افغانستان د بشري حقونو او ښځو په چارو کې، چې ماموریت یې نن (دوشنبه، د دلوې لومړۍ) پای ته رسېږي، په دوامداره توګه له طالبانو څخه د بشري حقونو په ځانګړې توګه د ښځو د حقونو د تامین غوښتنه کړې ده.
هغې په خپل “مخه ښې لیک” کې پر اېکس پاڼه لیکلي: “د طالبانو د ځواب ویلو او د افغان زړورو ښځینه مشرانو او د بشري حقونو مدافعینو د هڅو څخه د ګټې اخیستنې لپاره، ډېر کارونه باید ترسره شي. تر ټولو مهمه دا ده چې موږ باید کار ته دوام ورکړو ترڅو طالبان قانع کړو چې هغه مخرب احکام لغوه کړي چې ښځې او نجونې یې له اختیار، تحرک، تحصیل، معیشت، غږ او د ژغورونکي طبي موسسو ته له لاسرسي څخه محرومې کړي دي.”
تر اوسه روښانه نه ده چې د متحده ایالاتو نوی حکومت د ډونالډ ټرمپ په مشرۍ به څوک د هغې پر ځای وټاکي او یا به د افغانستان د بشري حقونو او ښځو په چارو کې د ځانګړې استازې پوست وساتي که نه.
اغلې امیري وايي چې طالبانو د “وېرې او ترهې” کلتور رامنځته کړی او افغانستان یې په یو دایره کې د وابستګۍ او فقر کې ساتلی دی. باید له طالبانو څخه غوښتنه وشي چې د قومي او مذهبي اقلیتونو حقونو ته درناوی وکړي.
د متحده ایالاتو ځانګړې استازې زیاتوي چې د افغانستان ټول وګړي د خپلو خوبونو د تحقق فرصت مستحق دي.
هغې په دې لیکنه کې زیاته کړې چې باور لري یوه ورځ به راشي چې افغانستان به یوې ټولشموله ټولنې ته پرمختګ وکړي او د هغې زامن او لوڼې به د یوې غوره راتلونکې لپاره وړتیا ولري.
رینا امیري وايي چې نړۍ باید د افغانستان د زړورو ښځو او نارینه وو تر څنګ ودریږي. دا د سیمې او نړۍ لپاره یوه اخلاقي او ستراتیژیکه اړتیا ده.
دا په داسې حال کې ده چې د اغلې امیري د ماموریت دوره د متحده ایالاتو د ځانګړې استازې په توګه د افغانستان د بشري حقونو او ښځو په چارو کې له جدي نیوکو سره مخ ده.
یوشمېر د بشري حقونو فعالان او د ښځو د حقونو مدافعین وايي چې هغې په خپل ماموریت کې نه یوازې په دې برخه کې “لاسته راوړنه نه ده درلودلې”؛ بلکې د طالبانو له خوا د هېواد د وګړو په ځانګړې توګه د ښځو پر حقونو او ازادیو محدودیتونه او بندیزونه د اغلې امیري د ماموریت په وخت کې زیات شوي دي.
