دغه افغان لوبغاړې د کیم اونیونګ تکواندو جام سیالیو کې د برنزو نړیوال جام وګاټه
د کیم اونیونګ سیالۍ چې د ښځو لوبغاړو په برخه کې د سوېلي کوریا په موجو ښار کې ترسره شوې، د تکواندو افغان لوبغاړي فاطمه جامي هم په کې برخه اخیستي وه. دغه افغان لوبغاړې په ۵۵ وزن کې د کاناډا او سوېلي کوریا تکواندو لوبغاړو ته په ماتې ورکولو سره د برنزو جام خپل کړ او افغانستان ته یې دغه ویاړ ورپه برخه کړ.
نور ولولئ: د افغانستان تر ټولو مشهور سپورت
فاطمه جامي هغه افغانه ده چې په ایران کې مهاجره ده او له ایران څخه یې په دې لوبو کې برخه اخیسته وه او دوه ورځې وړاندې یې ځان ورسولی و.
په یاده افغان لوبډله کې څوک دي؟
د افغان تکواندو لوبډله د همایون په نوم له یوه روزونکي او لوبغاړي سره سوېلي کوریا تللي ده. داسې ویل کېږي چې په ایران کې نور افغان لوبغاړي هم شته خو د مالي ستونزو له امله نه شي کولی چې په دې سیالیو کې ګډون وکړي. فاطمه جامي به په هغو نړیوالو ازادو سیالي کې ګډون وکړي چې «چون چان» ښار کې ترسره کېږي.
نور ولولئ: فوټبال: افغان ښځینه لوبډلې د بریتانیا پارلمان ښځینه لوبډله ماته کړه
کله چې په افغانستان کې طالبان واک ته ورسېدل نو دلته اکثرو ښځینه لوبغاړو د دوی د محدودیتونو ښکار شول او نه شي کولی چې دننه په افغانستان کې خپل فعالیتونه تر سره کړي، ځکه طالبان اجازه نه ورکوي چې د پوهنتونو، ښوونځیو تر څنګ په نورو برخه کې فعالیت ولري.
په نړیوالو لوبغالو کې د افغان لوبغاړو ځلېدنه
په نړیوالو سیالي کې د فوټبال، کرکټ، تکواندو او فوتسال سیاليو کې افغان لوبغاړي په دې وروستیو کې ډېر ښه ځلېدلي افغانستان ته یې افتخارات راوړي دي. دوی په نشتو امکاناتو کې په نړیواله کچه خپلې وړتیاوې نړیوالو ته وښودي او دوی ته یې دا پیغام ورکړ چې افغان ملت په هر ډګر کې د ځلېدو وړتیا لري او کولی شي چې په هره برخه کې خپلو حریفانو ته ماتې ورکړي.
د طالبانو له واکمنېدو سره سم د فوټبال ښځینه لوبډله او نور افغان لوبغاړو هېواد پرېښود او اوس په نورو هېوادونو کې د افغانستان په نمایندهګي لوبېږي او ویاړونه ګټي.
