امیرخان نن په یوه خبري غونډه کې د پاکستان دغه ادعا چې ټي ټي پي له افغانستان بریدونه کوي، رد کړه

د طالبانو د بهرنیو چارو وزیر امیرخان متقي د ټي ټي پي د ملاتړ په باب د پاکستان د استازي څرګندونې رد کړې.

پرون (چهارشنبې) د افغانستان په اړه د ملګروملتو د امنیت شورا په غونډه کې د پاکستان استازي وویل چې پاکستاني طالبان یا ټي ټي پي، چې ده فتنه الخوارج وبلل، هره ورځ د افغانستان له خاورې پاکستان ته اوړي او پر پاکستاني ځواکونو حملې کوي.

ده همداراز ادعا وکړه چې پاکستان کره اسناد او شواهد لري چې ټي ټي پي د طالبانو د ځینو عناصرو له ملاتړه برخمنه ده.

د طالبانو د بهرنیو چارو د وزارت غبرګون

خو امیرخان متقي نن په یوه خبري غونډه کې د پاکستان د استازي څرګندونې رد کړې.

متقي چې د خپل وزارت پروګرامونه او بریاوې تشریح کولې، همداراز وویل چې د تېر یوه کال په موده کې د بهرنیو چارو وزارت توانېدلی چې د سیمې په کچه د هېواد بهرنۍ سیاسي استازولۍ کنټرول او مدیریت کړي او دمګړۍ په بېلا بېلو هېوادونو کې د افغانستان ۳۹ سیاسي استازولۍ د اسلامي امارت اطاعت کوي.

متقي زیاته کړه چې د بهرنيو چارو وزارت له لوري د ډيپلوماتيکو اړيکو او سياسي درک رامنځته کولو د هڅو پر دوام قزاقستان او قرغيزستان هېوادونو د خپلو ممنوعه ډلو له نوملړ څخه د اسلامي امارت نوم بهر کړی او روسيه به هم په نژدې راتلوونکي کې ورته اقدام وکړي.

نور ولولئ: د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی

نور ولولئ:  اسلام اباد له طالبانو د ټي ټي پي د له منځه وړلو غوښتنه وکړه

له ملګرو ملتونو د امیرخان متقي غوښتنه

د طالبانو د بهرنیو چارو وزارت سرپرست د یوې پوښتنې په ځواب کې وویل؛ ملګرو ملتونو او نړیوالې ټولنې ته په کار ده چې په افغانستان کې روان حقایق په نظر کې ونیسي او د هغو مطابق قضاوت وکړي.

طالبان له ملګروملتو غواړي چې په دغه سازمان کې د افغانستان چوکۍ دوه ته وسپاري خو ملګري ملتونه او ګڼ هیوادونه د ښځو په وړاندې د طالبانو تبعیضي پالیسیو ته په کتو د هغوی حکومت په رسمیت نه پېژني.

سیاسي کارپوهان بیا وايي، طالبانو د نړیوالو او افغان ملت غوښتنو ته مثبت ځواب نه دی ویلی، نو نړیواله ټولنه به هم په اسانۍ طالبانو ته رسمیت ورنه کړي.

د یادونې وړ ده چې په دغه غوښتنو کې د ښځو او نجونو پر وړاندې د بندیزونو وضع کول او له زده کړو راګرځولو په اړه دریځ پرېښودل دي.