د اسپانیا د ښځو فوټبال لوبډلمشره د نړیوال جام له ګټلو وروسته د پلار له مړینې خبره شوې ده
د اسپانیا د ښځو فوټبال د ملي لوبډلې کپتانه، چې پرون یکشنبه یې د انګلستان خلاف د نړیوال جام پایلوبه کې د برخلیک ټاکونکي ګول په وهلو سره اسپانیا نړیواله اتله کړه، د نړیوال جام له ګټلو وروسته د خپل پلار له مړینې خبره شوه.
د اولګا کارمونا پلار له اوږدې مودې راهیسې ناروغ او د تېرې جمعې پر ورځ مړ شوی و، خو ملګرو او کورنۍ یې ترې دا خبره د نړیوال جام سیالیو لپاره پټه ساتلې وه.
د کارمونا عمر او د هغې شهرت
اغلې کارمونا ۲۳ کلنه او د ریال ماډریډ د ښځینه لوبدلې غړې هم ده.
اسپانیا د نړیوال جام پایلوبه کې د هغې په یوازني ګول سره انګلنډ ته ماته ورکړه.
اولګا کارمونا د خواله رسنۍ یوه پیغام کې لیکلي “پوهېږم چې نن شپه دې زما لوبه لیدله او راباندې ویاړلې. روح دې ارام پلاره.”
هغې له خپل دغه پیغام سره د بریا د میډال عکس هم خپور کړی چې ښکلوي یې.
د نړیوال جام ګټوونکو ته د اتلولۍ پر جام سربېره د سرو زرو مډال هم ورکول کېږي.
د اسپانیا د فوټبال ټولنې ‘اراېفيياېف’ د خواله رسنۍ یوه پيغام کې لیکلي چې دغه ټولنه د اولګا کارمونا د پلار د مړینې پر اعلان خورا خواشینې ده.
د ار یي اېف پیغام
ار اېف يي اېف زیاته کړې “زموږ د خواخوږۍ غېږې د دغه ستر غم په شېبه کې اولګا او د هغې کورنۍ ته پرانېستې دي. اولکا موږ درسره مینه لرو – ته د اسپانیا د فوټبال ژوندی تاریخ یې.”
د اسپانیا فوټبال ښځینه لوبډلې د ۲۰۲۳ کال د نړیوالې اتلولۍ سیالیو کې ټولټال ۷ لوبې درلودې او اغلې کارمونا ترې په پنځو لوبو کې له پیله لوبډله کې شامله وه.
نور ولولئ: ښځینه فوټبال نړیوال جام؛ انګلنډ د نایجریا په ماتولو منځلوبو ته لار پیدا کړه
د اسپانیا رېلېوو رسنۍ ویلي، د اولګا کارمونا کورنۍ او ملګرو ددې لپاره له هغې د پلار د مړینې خبر د پټ ساتلو پرېکړه کړې وه چې نوموړې پر پایلوبه تمرکز وکړای شي.
د فوټبال د نړیوال جام لوبې استرالیا کې کېدې او د اولګا مور او وروڼه شنبه د نوموړې ملاتړ دغه هېواد ته ورسېدلي وو.
ریال ماډرېډ لوبډلې هم له اغلې کارمونا، د هغې خپلوانو او ټولو مینوالو سره خواخوږي څرګنده کړې ده.
کارمونا د ښځینه فوټبال نړیوال جام کې ځان داسې وځلوه چې نن نړیوالې رسنۍ ورباندې بحثونه کوي.
