تېره ورځ د ټویټر مالک ایلن مسک وویل چې د ټویټر اوسنی نښان به په (X) بدل کړي

وروسته له هغه چې مسک تېر کال ټوېټر په ۴۴ میلیارده ډالرو واخیست، دا د بدلونونو یو تازه اقدام دی چې هغه یې په دې شبکه کې رامنځته کوي.

ښاغلي مسک په څو پرله پسې ټویټونو کې وویل، پلان لري چې د دوشنبې په ورځ د ټویټر لوګو بدله کړي.

د روانې جولای میاشتې په پیل کې، مسک په ټویټر کې نوي مقررات پلي کړل او وویل چې د هغو پوسټونو شمیر محدودوي چې کارونکي یې په یوه ورځ کې لوستلی شي.

په ټویټر کې د حاسبونو حال

مسک ویلي چې تائید شوي حسابونه به په موقته توګه د ۶۰۰۰ پوسټونو، غیر تصدیق شوي حسابونه به ۶۰۰ پوسټونو او نوي غیر تصدیق شوي حسابونه به په ورځ کې تر ۳۰۰ پوسټونو په لوستلو پورې محدود شي.

نور ولولئ: ترېډز- انسټاګرام له ټویټر سره د سیالۍ لپاره نوی اپلیکشن

د ټویټر د مالک پدغه کړنه کاروونکو په پراخه کچه نیوکې کړي دي. منتقدین وايي چې د مسک کړنې ممکن په شبکه کې سوداګریز اعلانونه کم کړي او د یوې متحرکې شبکې په توګه به د هغې کلتوري نفوذ کمزوری کړي.

په ټویټر کې اجباري بدلونونه

مسک همداشان په ټویټر کې اجباري بدلونونه پلي کړل چې په کې د کارکوونکو د شمیر کمول او د شبکې د کارونکو څځه د حساب د تائید د علامیې یا نښې د ترلاسه کولو په بدل کې پیسې اخیستل شامل دي. د مسک دې عمل کاروونکي او د اعلاناتو شرکتونه له دې سترې ټولنیزې رسنۍ څخه ګوښه کړي دي.

مخکې له دې چې مسک ټویټر واخلي، یوازې وړ حسابونو لکه فعالین، ژورنالیستان او مشهوروشخصیتونو کولی شول د نیلي مرغۍ د تائید نښه ترلاسه کړي، خو مسک هغه د “خان او غریب” سیسټم بللی دی.

مسک څو ورځې وړاندې وویل چې د دې شبکې له پېرلو وروسته په تېر یو کال کې د ټویټر عواید چې تر ډېره له سوداګریزو اعلانونو ترلاسه کېږي نیمايي ته راټیټ شوي دي.

په ټویټر کې د اعلاناتو او پیغامونو د بیا راجلبولو لپاره په یو اقدام کې، مسک د می په میاشت کې د ان بي سي خبري شبکې اجرائیوي رئیسه لیندا یاکارینو د ټویټر شبکې د اجرائیوي رئیسې په توګه وګمارله.

دا په داسې حال کې ده چې ټویټر په ټولنیزو رسنیو کې مخکښه بلل کېږي، ځکه د نړۍ اکثره سیاسي څېرې پر تویټر زیات فعالیتونه کوي.