تولیدي شرکتونه هڅه کوي چې داسې سمارټ فون جوړ کړي چې لږ چارج او ډېر کار وکړي
د هسپانیا په بارسلونا کې دا اونۍ د موبایل تیلیفونونو په نړیوال نندارتون کې ډیر پام داسې تیلیفونونو ته اوښتی چې لږ چارج وغواړي او زیات کار ورکړي.
د سمارټ موبایل تیلیفونونو له عصري کېدو سره ددغو تلیفونونو ډیری کاروونکي د خپلو تلیفونونو په دوامداره توګه د چارجولو له اړتیا څخه ناخوښ دي.
د فاریسټر په نوم د ټکنالوژۍ د څېړنو موسسې شنونکي تامس هسن وویل: “[د موبایل تلیفونونو] ټول جوړونکي په دې لټه کې دي چې ښه فعالیت لرونکي بطرۍ ولري. فکر کیږي چې په دې برخه کې موږ وروسته پاتې یو او زیات پرمختګ ته اړتیا ده.”
د تولیدي شرکتونو ترمنځ د بیټرۍ په برخه کې رقابت
د موبایل تیلیفونونو په برخه کې پرمختګ ددې لامل شوی چې ډیری د تلیفونونو ماډلونه له یو بل سره لږ توپیر لري، او د هسن په خبره، د رقابت دپاره بطرۍ هغه برخه ده چې د موبایل جوړونکي کولی شي”له خپلو سیالانو وړاندې شي.”
له هغه راهیسې چې موبایل تیلیفونونه د ۲۰۰۰ په لسیزه کې په لومړي ځل بازار ته وړاندې شول، د بطریو په برخه کې یې د پام وړ پرمختګ شوی. د بیلګې په توګه ځینې تلیفونونه اوس کیبل ته له اړتیا پرته چارج کیدای شي. خو کتونکي وايي، په دې برخه کې د لا زیات پرمختګ دپاره اړتیا لیدل کیږي.
نور ولولئ: د ځیرکو مبایلونو د زیات استعمال زیانونه او اغېزې
نور ولولئ: مصنوعي ځیرکتیا څومره پېژنئ؟
نور ولولئ: د کار پر نړیوال مارکېټ د مصنوعي ځیرکتیا اغېز؛ موږ باید څه وکړو؟
په همدې لړ کې، د چین د ټکنالوژۍ یو شرکت د جنوري په میاشت کې اعلان وکړ چې د موبایل تلیفون داسې بطرۍ یې جوړه کړې چې په اتومي انرژۍ چلیږي او چارجولو ته له اړتیا پرته ۵۰ کاله کار ورکوي.
د سمارټ فون لومړنۍ بیټري چې په اټومي انرژۍ چلېږي
د بیټاولټ په نوم دغه بیجینګ میشتې شرکت وايي، دغه بطرۍ د یوې سکې په اندازه ده چې پکې د نیکل-۶۳ ایسوټوپونه ځای پر ځای شوي دي.
دا په نړۍ کې د موبایل تلیفونونو لومړنۍ بطرۍ چې په اتومي انرژۍ چلیږي.
د بیټاولټ شرکت چې د بارسلونا په نندارتون کې برخه نلري، وايي دا بطرۍ د ازمونې په پړاو کې ده او دا یې نه دي ویلي چې کله به بازار ته وړاندې شي.
په بازار کې د موجودو اوسنيو زیاتره موبایل تلیفونونو بطرۍ له لیتیمو جوړې شوي دي چې ډیر زیات دوام نه کوي او د تقاضا له زیاتېدو سره یې قیمت هم لوړ شوی دی.
نړیوال تولیدي شرکتونه اوس په دې برخه کې هڅې کوي ترڅو دغه د غوره بیټریو په برخه کې رقابت وکړي او په نړیوالو بازارونو کې خپلو تولیداتو ته ځای پیدا کړي.
