اړوند خبرونه:
د اسرائیل او حماس تر منځ د اوربند له هوکړې د ملګرو ملتونو هرکلی
اسرائیل: د واشنګټن له وسلو پرته غزه کې جګړې ته دوام ورکوو
په غزه کې د اسرائیلو صهیونیستي رژیم هوايي برید کې ۲۹ فلسطینیان شهیدان شوي
د عرب اماراتو نوبل نایټ ۳: مرکزي غزه کې به له بې ځایه شوو سره مرستې وکړو
د ملګرو ملتونو سرمنشي د حماس او اسراییلو ترمنځ د اوربند له هوکړې هرکلی کړی او د دې هوکړې پر بشپړ پلي کېدو یې ټینګار کړی دی.
د ملګروملتونو عمومي منشي، انتونیو ګوترش وايي: «زه د دې هوکړې په مسوده کې د مصر، قطر او د امریکا د متحدو ایالتونو د منځګړیتوب د دوامداره هڅو ستاینه کوم. دې پرمختګ ته د رسېدو په موخه د ډیپلوماټیک حل موندلو لپاره د دوی نه ستړي کیدونکي ژمنې خورا مهمې دي. زه له ټولو ښکېلو اړخونو غواړم چې پر خپلو ژمنو عمل وکړي.»
ترکيې، پاکستان، جرمني، ايټاليا، فرانسې، جاپان، اسټراليا او د نړۍ يو شمېر نورو هېوادونو هم د حماس او اسرایيلو ترمنځ د اوربند د هوکړې ستاينه کړې ده.
د اسټرالیا لومړي وزیر، انتوني البانیزي هم وايي: «د اسټرالیا حکومت په دوامداره توګه د اوربند او د یرغمل شویو د خوشې کولو لپاره د نړۍوالو غوښتنو برخه وه. دا هوکړه په سیمه کې د سولې او ثبات لپاره یو رغنده ګام دی.»
طالبانو هم حماس ته له اسراييلو سره د اوربند په اړه مبارکي وويله او په دې برخه کې يې د امريکا، مصر او قطر د هڅو ستاينه وکړه.
د بهرنیو چارو وزارت د عامه اړیکو رییس ضیا احمد تکل ویلي چې د پخوانیو هوکړو له مخې باید نړۍواله ټولنه ډاډ ترلاسه کړي چې اسراییل به د اوربند دغې هوکړې ته ژمن پاتې کیږي.
د بهرنیو چارو وزارت د عامه اړیکو رییس، ضیا احمد تکل په دې اړه وايي: «د اوربند دغه هوکړه د فلسطیني ولس د افسانوي زغم او د غزې په تړانګه کې د زړور مقاومت د څه پاسه ۱۵ میاشتو تاریخي مبارزې او قربانیو پایله ده.»
د غزې په تړانګه کې د اوربند وروستي پړاو خبرې د روان کال د جنورۍ په درېیمه د امریکا، مصر او قطر په منځګړیتوب د قطر په پلازمېنه دوحه کې پیل شوې.
په پای کې له دوو اوونیو خبرو وروسته حماس او اسراییلو په غزه کې پر اوربند او د یرغمل شویو بندیانو پر خلاصون هوکړه وکړه.
