د افغانستان پخواني ولسمشر حامد کرزي د دوحې غونډې ته ګونګ پیغام پر خپله ایکس پاڼه خپور کړی دی
د افغانستان پخوانی ولسمشر حامد کرزی چې د طالبانو تر واک لاندې کابل کې مېشت او ادعا کېږي چې سختو محدودیتو سره ژوند کوي، نن په ضمني ډول د افغانستان په اړه د دوحې د ترسره کېدونکې غونډې له ګډونوالو خپلې غوښتنې مطرح کړي.
کرزي د پوهنتونونو له یو شمېر استادانو سره د خپلې لیدنې عکسونه خپاره کړي او ویلي، چې دغو استادانو ورته د خپلو ستونزو یادونه کړې او د دوحې غونډې له ګډونوالو یې غوښتي چې د افغانستان د تعلیمي او تحصیلي وضعیت ښه کېدو ته پاملرنه وکړي.
د ښاغلي کرزي په پیغام کې ګونګوالی
حامد کرزي په خپله ایکس پاڼه کې نه ده روښانه کړې، چې د پوهنتونونو استادانو له کوم ډول ستونزو ورته شکایت کړی.
د طالبانو له بیا واکمنیدو سره، په پرله پسې ډول پر تعلیمي او تحصیلي بنسټونو د دوی د رژیم د قیوداتو خبر ورکول کیږي او اندېښنه ده چې له زده کړو د نجونو محرومول، له استادانو سره سیاسي او تبعیضي چلند او د تعلیمي او تحصیلي قوانینو پراخ نقض د دغه سکتور د شدیدو زیانونو سبب شوی.
نور ولولئ: کرزی: نړیوال باید د طالبانو نظام چپه نه کړي
نور ولولئ: سپنتا وايي چې کرزی د طالبانو د بندي په څېر دی
نور ولولئ: حامد کرزی: طالبان دې په نړیواله ټولنه کې د افغانستان د نوم ساتلو هڅه وکړي
د طالبانو چارواکي بیا هغو قیوداتو ته چې منتقدان یې د تعلیمي او تحصیلي نظام د زیانمنولو نوم ورکول کیږي، د « اصلاحاتو» نوم ورکوي او ادعا کوي چې تعلیمي او تحصیلي ادارې یې بهتره کړي دي.
د افغانستان په تړاو د دوحې را روانه ناسته
تمه ده چې د روانې فبرورۍ میاشتې په اتلسمه او نولسمه په دوحه کې د ملګرو ملتونو د سرمنشي په کوربه توب د افغانستان په اړه د سیمې د بېلابېلو هېوادونو د ځانګړو استازو په ګډون یوه مهمه غونډه ترسره شي.
دې غونډې ته له افغانستان سره د نړیوال تعامل د لار برابرولو نوم ورکړل شوی او د طالبانو د رژیم استازي هم ور بلل شوي، خو دغه رژیم پکې خپل ګډون مشروط کړی دی.
بل لورته طالبانو له ملګرو ملتونو غوښتي چې په اوسنیو شرایطو د افغانستان لپاره د ځانګړې استازي له ټاکلو سره مخالف دي.
طالبانو زیاته کړې چې د افغانستان لپاره نوي استازي ټاکلو ته اړتیا نه ويني. د نوي استازي له ټاکل کېدو سره دوه ځلې د طالبانو ویاند ذبیح الله مجاهد او یو ځل د طالبانو د بهرنیو چارو سرپرست وزیر امیرخان متقي مخالفت څرګند کړی دی.
