امیرخان متقي تمه لري چې د پاکستان له نوي حکومت سره به یې اوسنۍ خرابې اړیکې عادي حالت ته راوګرځي
د طالبانو د بهرنیو چارو سرپرست وزیر امیرخان متقي په افغانستان کې له طلوعنیوز شبکې سره د مرکې پرمهال تمه ښودلې چې د پاکستان له نوي حکومت سره به د طالبانو اوسنۍ ترینګلې اړیکې ښې شي.
هغه په دې مرکه کې یو ځل بیا ټینګار کړی چې د طالبانو تر رژیم لاندې افغانستان د هېڅ ګاوندي هېواد په زیان نه دی او نه به ددې هېواد له خاورې دوی ته کوم ګواښ متوجه شي.
طالبان له هر هېواد سره ښې اړیکې غواړي
د بهرنیو چارو وزارت سرپرست په دغې مرکه کې همدارنګه زیاته کړې چې سرپرست حکومت د ګاونډیانو په ګډون له ټولو هېوادونو سره د ښو اړیکو غوښتونکی دی.
ښاغلی متقي په دې هکله وايي:«امیدواره یو چې، د پاکستان له ټاکنو وروسته، د نوي حکومت په راتلو سره به لکه د دوی ځينو لوړپوړو چارواکو چې ځينې مثبتې څرګندونې کړې دي دا وضعیت به نور هم ښه شي، تر ټولو مهمه دا ده چې دواړه لورو ته ډېر غریب خلک مېشت دي، د هغوی اقتصاد، امنیت او سوکالي ډېره مهمه ده او موږ په دې ټولو برخو کې همکاري کړې ده.»
نور ولولئ: تازه؛ متقي وايي چې افغانستان کې د یوناما په شتون کې ځانګړي استازي ته اړتیا نشته
نور ولولئ: امیر خان متقي وايي، رسمیت پېژندنه د فشار په توګه کارول کېږي
نور ولولئ: امیرخان متقي: «ترهګري» او «بشرحقونه» لا هم بې تعریفه پاتې دي
د طالبانو دغه جګپوړی چارواکی له پاکستانه د افغان کډوالو ایستل سیاسي فشار ګڼي او ټینګار کوي چې په پاکستان کې د افغان کډوالو حضور دغه هېواد ته کوم ګواښ نهدی.
امیر خان متقي څرګندوي:«که دغه خلک د امنیت لپاره ګواښ وای، نو دا خلک خو ۴۰ کاله هلته وو، ولې خطر نهوو، که دا خلک د امنیت لپاره خطر وای، هلته خو اوس هم په مېلیونونو خلک شته، هغه ولې ګواښ نهدي، دا دلیل نهشي کېدای.»
له افغانستان ګاونډیو هېوادونو ته د کومې ستونزې نه پېښېدل
امیرخان متقي د خپلو خبرو په یوه برخه کې ډاډ ورکوي چې افغانستان د هېڅ هېواد لپاره ګواښ نهدی او ټینګار کوي چې د سیمې هېوادونه دې پایلې ته رسېدلي چې له افغانستانه به هېڅ ستونزه ورته پېښه نهشي.
د طالبانو د بهرنیو چارو وزارت سرپرست وايي:«له مسکو څخه هم قاصد راځي له بيجینګ نه هم راځي د سیمې له نورو هېوادونو هم راځي او دلته په یوه مېز درسره کېني او ګډ مجلس درسره کوي، دا ټولې نړۍ ته یو پیغام دی چې افغانستان د امن کور دی، د ډاډ کور دی سیمه ورسره خوشحاله ده، هغه لېرې پراته هېوادونه چې اندېښنه لري هغه هم باید د دوی پر پله، پل کېږدي؛ هو موږ ویلای شوو، سیمه اوس دې اجماع ته رسېدلې چې له افغانستان سره هېڅ ډول ستونزه نهلري.»
د یادونې وړ ده چې په پاکستان کې د ناامنۍ له زیاتېدو سره سم له ملا فضل الرحمان وروسته د جمعیت علمای اسلام ګوند مشر ملا حامد الحق او ورسره د ملایانو ډله کابل ته تللي او هلته همدا مهال له طالب چارواکو سره په کابل کې په خبرو بوخته ده.
