د یحیی سنوار په اړه د طالبانو اعلامیه وايي، د مشرانو په شهیدانولو سره جهاد نه کمزوری کېږي
دغه ډله وايي، اسرائیل او نوره کفري نړۍ نه شي کولی چې د مشرانو په شهیدانولو سره جهادي مبارزه کمزوري کړي بلکې لا به پسې تونده او پیاوړي وي.
د طالبانو ویاند ذبیح الله مجاهد د حماس ډلې د مشر د وژل کېدو په غبرګون د دغې ډلې د ریاست الوزرا د تسلیت پیغام خپور کړی چې په کې راغلي: «اسراییل دې په یاد ولري چې د مجاهدو مشرانو شهادتونه به له دوښمن سره جهادي مبارزه تونده او پیاوړې کړي.»
د سنوار د وژل کېدو غندنه
یادې ډلې د اسراییل د یو برید په پایله کې د یحیا سنوار وژل کېدل غندلی او له اسلامي نړۍ څخه یې غوښتي، چې د فلسطین د خلکو له داعیې څخه ملاتړ وکړي.
پرون د اسراییل پوځ اعلان وکړ، چې د یو لړ عملیاتو په ترڅ کې یې د حماس ډلې مشر یحیا سنوار وژلی دی.
تر دې پېښې وروسته د طالبانو لسګونو چارواکو او غړو د حماس د مشر پر وژل کېدو خواشیني څرګنده کړې ده.
نور ولولئ: د طالبانو رئیس الوزرا په غزه کې د اسرایلو وحشتونه غندلي
نور ولولئ: په غزه کې د اسرائیلو صهیونیستي رژیم هوايي برید کې ۲۹ فلسطینیان شهیدان شوي
اخوا پر طالبانو بیا نیوکې دا دي، چې د ایران د سرحدي ځواکونو په ډزو کې د لسګونو افغانانو پر مرګژوبلې چوپه خوله دي او د یحیا سنوار پر مړینې بیا اوښکې تویوي.
د سنوار جسد چېرته دی؟
د راپورونو له مخې، د اسراییل پوځ د سنوار د مړي له موندلو وروسته د هغه مړی یو نامعلوم ځای ته لېږدولی دی.
سنوار په ایران کې د اسماعیل هنیه تر وژنې وروسته د حماس د نوي مشر په توګه ټاکل شوی و.
نوموړی پر اسراییل د اکټوبر د اوومې د برید پلانوونکی هم بلل کېږي.
د ښاغلي سنوار له وژل کېدو وروسته د اسراییل لومړي وزیر بنیامین نتنیاهو د یوې ویډیو په خپرولو سره ویلي، چې د ټولو یرغمل شویو کسانو تر خوشې کېدو به دغې جګړې ته دوام ورکړي.
اسراییل له تېر یو کال راهیسې د یحیا سنوار، اسماعیل هنیه او حسن نصرالله په ګډون د حماس او حزب الله ډلې ډېر شمېر مشران او مهم غړي وژلي دي او د یادو ډلو په بشپړ له منځه وړلو ټینګار کوي.
سپینې ماڼۍ له اسرائیلو غوښتي چې د سنوار له وژل کېدو وروسته دې اوربند وکړي او جګړې ته دې دوام نه ورکوي، خو اسرائیلو په دې اړه کوم غبرګون نه دی ښوولی.
