طالبان په رسمیت نه دي پېژندل شوي، له همدې د مالدیف سفیر د طالبانو له سفیر سره له لیدنې وروسته وغوښتل شو
طالبان تر اوسه په رسمیت نه دي پېژندل شوي او د نورو هېوادونو ډیپلوماټیک استازي ورسره نه ګوري. له همدې امله د مالدیف د بهرنیو چارو وزارت په پاکستان کې خپل سفیر ورغوښتی چې ولې یې د طالبانو له سفیر سره لیدلي دي.
د فرانسې خبري اژانس د راپور له مخې، په اسلام اباد کې د طالبانو له سفیر سره تر لیدنې وروسته مالدیف خپل سفیر محمد طه له پاکستانه وغوښت.
بې له کومې اجازې لیدنه
له بل پلوه د مالدیف د بهرنیو چارو وزارت لهخوا په خپور شوي یو بیان کې راغلي، چې د دغې لیدنې په تړاو اجازه نه وه غوښتل شوې او په دې برخه کې د مالدیف حکومت لهخوا لازم ګام اخیستل شوی دی.
د دغه بیان له مخې، مالدیف هغه حکومت چې په ملګرو ملتونو کې د افغانستان استازیتوب کوي؛ د افغانستان د مشروع حکومت په توګه پېژني.
ورته مهال پاکستانۍ رسنۍ اردو نیوز هم په خپلو یوه راپور کې ویلي، چې مالدیف په پاکستان کې د خپل سفارت له پاڼې د ښاغلي طه نوم لرې کړی دی.
نور ولولئ: م.م. کې د امریکا سفیره وايي، امریکا طالبان په رسمیت نه پیژني
نور ولولئ: مککال افغانستان ته د امریکايي چارواکو سفر له افغانانو سره خیانت بولي
په پاکستان کې د مالدیف سفیر محمد طه په اسلام اباد کې د طالبانو له سفیر سردار احمد شکېب سره درې ورځې وړاندې د نومبر په لومړۍ نېټه لیدلي و.
د یاد سفیر ټینګار
هغه مهال په اسلام اباد کې د طالبانو سفارت د دغې لیدنې په اړه پر اېکس پاڼه لیکلي و، چې ښاغلي طه په دغې لیدنه کې ټینګار کړی چې هېواد یې له افغانستان سره د نږدې او ټینګو اړیکو غوښتونکی دی.
هغه دغه راز هیلهمندي څرګنده کړې وه، چې د افغانستان له لارې به وشي کړای د منځني ختیځ له هېوادونو سره ټرانزیټي اړیکي ټینګ کړي.
که څه هم د ځینو هېوادونو سره طالبانو ښې اړیکي جوړې کړې دي؛ خو د درېیو کلونو په تېرېدو سره لاهم د طالبانو حکومت هیڅ یوه هېواد په رسمیت نه دی پېژندلی.
طالبان بیا په بېلابېلو ویناوو کې ادعا کوي چې نړیوال ورسره د تعامل په هڅه کې دي، خو له دغه ادعا سره سره بیا هم په نړۍ کې د کوم هېواد له لوري په رسمیت نه دي پېژندل شوي او له دغه رژیم سره رسمي اړیکې نه پالي.
