طالبانو د ښځو پر مخ د طبي زده کړو بندیز ته په کابل کې د بریتانا سفارت غبرګون ښوولی دی

د طالبانو امیر ملا هیبت الله د یوه فرمان له مخې د ښځو او نجونو پر وړاندې د طبي زده کړو دروازو ته هم کلپونه واچول او دغه زده کړو یې هم منع کړې.

د افغانستان لپاره د بریتانی د سفارت شارژدافیر د نجونو او ښځوه د طبي روزنیزو مرکزونو د تړلو له امله د طالبانو پر وروستي اقدام اندېښنه څرګنده کړه. رابرټ ډیکسن د طالبانو دا اقدام د ښځو د تعلیم له حق یوه بله سرغړونه ګڼلې، چې روغتیايي خدمتونو ته د ښځو لاسرسی محدودوي.

د طالبانو دغه اقدام ته د بریتانیا غبرګون

د طالبانو لپاره د بريتانيا د سفارت شارژدافير په اېکس پاڼه کې د طالبانو د مشر ملا هبت اللله د نوي فرمان په غبرګون کې ليکلي: “زه د نویو راپورونو په اړه ژوره اندیښمن یم چې طالبان په افغانستان کې د ښځو د طبي زدکړو مخه نیسي. دا د ښځو د تعلیم پر حق یو بل تیری دی او د افغان میرمنو او ماشومانو لپاره به روغتیایی خدمات نور هم محدود کړي.”

د طالبانو مشر ملا هبت الله په یوه نوي فرمان کې د نجونو د لوړو او نیمه لوړو زدکړو ټولې موسسې بندې کړې .

نور ولولئ: ګورډن براون: د طالبانو له خوا د افغان ښځو او نجونو ځورول د بشریت ضد جنایت دی

نور ولولئ: امریکايي سفیرې د طالبانو پر وړاندې د نړۍ هېوادونه یو والي ته راوبلل

د طالبانو د عامې روغتیا وزارت د دوشنبې په ورځ د روغتیايي بنسټونو مسوولینو ته خبرداری ورکړ، چې نور په دغو مرکزونو کې نجونې د زدکړو اجازه نه لري.

په تیرو درېو کلونو کې د نجونو لپاره د پوهنتونونو او ښوونځیو له تړلو سره سره، دوی په روغتیایي موسسو کې زدکړو ته دوام ورکړ او د قابله ګۍ، درملو جوړولو، لابراتوار، ایکس ري، فزیوتراپي، نرسنګ او د غاښونو په برخو کې روزل کېدې.

په افغانستان کې د نسايي‌ولادي او نرسانو کمښت

اوس د روغتيايي زدکړو د موسسو په تړل کېدو سره به په افغانستان کې د نسايي ولادي او نرسانو د کمښت بحران لاپسې زيات شي.

طالبانو واک ته له راتګ وروسته تر شپږم ټولګي پورته د نجونو ښوونځي وتړل او بیا یې په پوهنتونونو کې پر زدکړو بندیز ولګاوه.

دا محدودیتونه په تدریجي ډول پراخ شول او په دولتي او غیر دولتي ادارو کې د ښځو د کار منع کول هم پکې شامل دي.

سربېره پردې، میرمنې پارکونو ته له تللو، حمامونو، د ښکلا سالونونو او له محرم پرته سفر کولو منع شوې دي.

په ښځو باندې د طالبانو محدودیتونو په نړیواله کچه پراخ غبرګونونه راپارولي دي.

د ملګرو ملتونو د بشري حقونو دفتر او یو شمېر هېوادونو دغه کړنې له بشري حقونو ښکاره سرغړونه، د بشریت ضد جنایت او د جنسیتي تبعیض یوه بېلګه بللې ده.