د عیسویانو مشر پاپ فرانسس هم د پاکستان له لوري د افغان کډوالو جبري ایستنه وغندله
د نړۍ ګڼو هېوادونو او سازمانو د اسلام اباد دا پرېکړه وغندله چې ګواکي افغان کډوال باید له پاکستان ووځي او افغانستان ته لاړ شي. کله چې د پاکستان لخوا ورکړل شوي نېټه پوره شوه نو د افغان کډوالو شتمنۍ لوټ او په زور له دغه هېواد ایستل کېږي.
د طالبانو حکومت، د بشري حقونو د بېلابېلو سازمانونو او د ملګرو ملتونو د ادارو ترڅنګ په نړیواله کچه د کاتولیکو عیسویانو مشر پاپ فرانسس هم د یکشنبې په ورځ له پاکستانه د افغان کډوالو د اېستلو پرېکړه غندلې ده.
پاکستان کې د افغان کډوالو پناه
نوموړي په واتیکان کې د ستنېدونکو افغان کډوالو پر وضعیت د اندېښنې په څرګندولو سره زیاته کړې چې، «افغان کډوالو په پاکستان کې پنا اخیستې وه، خو اوس د بېرته تګ له پاره هېڅ ځای نه لري.»
نور ولولئ: امیر خان متقي وايي، د پاکستان لهخوا د افغان کډوالو شتمنۍ لوټ کېږي
نور ولولئ: له پاکستانه ۱۶۵ زره افغان کډوال افغانستان ته ستانه شوي
هغه ویلي د کډوالو په زور اېستلو سره به ځینې هغه کسان له ګواښ سره مخ شي چې افغانستان يې د سر خوندينې په پار پریښی و.
بېلابېلو نړیوالو ادارو په وار وار سره له پاکستانه وغوښتل چې د کډوالو د اېستلو په اړه خپله پرېکړه بدله کړي خو پاکستان خپل دغه دریځ نه بدلیدونکی بولي.
له دې سره، د پاکستان د پارلمان غړي او د پښتون ژغورنې غورځنګ یوه مخکښ محسن داوړ په خپله اېکسپاڼې لیکلي چې، پاکستان اوس د افغان کډوالو په پلمه د پاکستان پښتانه هم خپل هدف ګرځوي.
د نوموړي په خبره، «پاکستان د افغان کډوالو په اېستلو سره د بشر ضد جنایت کوي.»
پاکستان کې ملتپال ګوندونه
اخوا، د عوامي نېشنل ګوند مخکښ مشر سردار حسین بابک افغانستان انټرنشنل ته د یوې ویډیو په استولویو ځل بیا ټینګار کړی چې، په پاکستان کې د افغان کډوالو د «تذلیل یا سپکاوي» مخنیوی باید وشي.
نوموړي همداراز زیاته کړې ده چې، د کډوالو ستونزو ته په کتو سره د پاکستان حکومت باید خپله پرېکړه بدله کړي.
پاکستان د روانې میاشتې له پیل سره له دې هېواده د څه باندې۱،۷ میلیونه افغان کډوالو د اېستلو لړۍ رسماً پيل کړه.
د راپورونو له مخې له تېرو څو اونیو راهیسې څه باندې یو لک او ۵۰ زره کډوال بېرته افغانستان ته ستانه کړای شوي دي.
دغه کډوال اوسمهال د خوراکي توکو، اوبو او د سرپناه له نشتوالي شکایت کوي، خو د طالبانو حکومت د راستنېدونکو کسانو له پاره د یو کمېسیون د جوړېدو خبر ورکړی چې د کډوالو ستونزو ته ورسیږي.
