راپورونه وايي چې ملګرو ملتونو د هرات زلزلهځپلو سره د مرستې لپاره څه باندې ۳۷ میلیونه ډالر پیدا کړي دي
د روان کال د تلې په ۱۵مه هرات ولایت کې یوې زورورې زلزلې ګڼو کورونیو د سر او مال زیانونه واړول او ګڼې سیمې یې وځپلې چې ددې زلزلهځپلو سره لا هم په کافي اندازه مرستې نه دي شوي ځکه ملګري ملتونو راپور ورکړی و چې د کافي مرستو لپاره بودجه نه لري، خو اوس یې اعلان وکړ چې بودجه یې تر لاسه کړې ده.
نور ولولئ: د هرات زلزله؛ زیانمن خلک وايي، هوا سړه ده خو سرپناه نه لرو
په هرات ولایت کې له خونړۍ زلزلې او د هغې له ټکانونو وروسته ملګرو ملتونو په خپل تازه راپور کې ویلي، چې د هرات له زلزله ځپلو سره یې د مرستې له پاره تر اوسه پورې ۳۷،۵ میلیون ډالر ترلاسه کړي دي.
د افغانستان لپاره د بشري چارو اداره
د افغانستان له پاره د ملګرو ملتونو د بشري چارو د همغږۍ دفتر (اوچا) د چهارشنبې په ورځ (د لیندۍ ۸ مه) په خپل راپور کې زیاته کړې ده چې، د هرات له زلزله ځپلو سره د مرستې له پاره ۱۷۳ میلیونه ډالرو ته اړتیا لري چې له دې شمیر څخه یې یوازې ۳۷،۵ میلیون ډالر ترلاسه کړي دي.
نور ولولئ: د هرات زلزلهځپلو سره د امریکا ۱۲ میلیونه ډالر بشري مرسته
د دغه سازمان د معلوماتو له مخې، تر اوسه پورې په هرات ولايت کې د تلې ۱۵مې نیټې د زلزلې له امله له ۲۴۲ زره او ۴۰۰ کسانو سره مرسته شوې ده.
اوچا دغه راز په هرات کې د ټولو زيانمنو شويو سره د ستونزو د هواري له پاره د زياتو مرستو په ترلاسه کېدو ټینګار کوي او له اړوندو مرستندویه بنسټونو د بیړنیو مرستو غوښتنه کوي.
یادې زلزلې خلکو ته ډېر زیان اړولی
په هرات کې د تلې ۱۵مې نېټې زلزلې او وروسته له هغې ټکانونو د دغه ولايت اوسېدونکو ته ډېر ځاني او مالي زيانونه اړولي دي.
له ویجاړونکې زلزلې وروسته د ژمي سړې هوا د زیانمنو کورنیو ستونزې څو برابره زیاتې کړې دي چې ډیری مرستندویه او نړیوالې ادارې په افغانستان کې د انساني ناورین رامنځته کېدو اندېښمن کړي دي.
د هرات ولایت یو شمیر اوسیدونکي، طالبان د مرستو په ناسم وېش او په هغو کې په درغلیو تورنوي او وایي چې دا ډله په خپله خوښه پر خلکو مرستې ویشي.
پر دې سربېره طالبانو د کمزوریو مدیریت له امله ونه شو کړی چې تر خاورو لاندې ښځې او ماشومان زر له خاورو بهر کړي او همدا لامل شو چې د زلزلې په قربانیانو کې د مړو شمېر زیات شي.
