کله چې طالبانو هند ته ډیپلوماټان ورپېژندل، نو د لومړي ځل لپاره طالب پلاوی هند ته تللی دی
طالبانو هند ته د قونسلي چارو د پر مخ وړلو لپاره څو ډیپلوماټان ور وپېژندل او دا لومړی ځل دی چې طالب پلاوی هم دغه هېواد ته سفر کوي.
هند ته د طالب ډېپلوماټانو له ورپېژندلو وروسته د طالبانو ویاند ذبیح الله مجاهد وايي، د یادې ډلې تر واک لاندې د اترا ادارې د رییس په مشرۍ یو پلاوی هند ته تللی دی.
هند ته د اترا ادارې د مشر سفر
طالبانو ویاند ذبیح الله مجاهد د چهارشنبې په ورځ د (لړم ۲۲مه) په خپله اېکس پاڼه لیکلي، چې د دغې ډلې د اترا ادارې د عمومي رییس سید برات شاه په مشرۍ یو پلاوی هند ته په سفر تللی.
ښاغلي مجاهد زیاته کړې، چې د یادې ډلې د اترا ادارې رییس او پلاوي د سوېلي اسیا د مقرراتو د ادارو په غونډه کې د ګډون په موخه هند ته رسېدلی دی.
دغه غونډه تېره ورځ په نوې ډیلي کې د هند په کوربهتوب ترسره شوه.
نور ولولئ: طالبان ډونالډ ټرمپ ته؛ د افغانستان بانګ د ۹ میلیارده کانګل شتمني راته ازاد کړئ
نور ولولئ: د هند بهرنیو چارو وزارت: کابل ته تللی پلاوی پر اقتصادي اړیکو غږېدلی
پر افغانستان د طالبانو له واکمنېدو وروسته دا لومړی ځل دی، چې یو لوړپوړی طالب چارواکی هند ته سفر کوي.
یوه اونۍ وړاندې د هند د بهرنیو چارو وزارت مرستیال جي پي سېنګ د یوه پلاوي په مشری د طالبانو د دفاع وزیر ملا یعقوب مجاهد او د دغې ډلې د بهرنیو چارو وزیر امیرخان متقي سره په جلا، جلا لیدنو کې د طالبانو او هند ترمنځ د دوه اړخیزو اړیکو پر زیاتولو خبرې کړې وې.
هند ته د نویو ډیپوماټانو ورپېژندل
د دغه هندي چارواکي او لوړپوړو طالب چارواکو تر لیدو کاتو څو ورځې وروسته د طالبانو له لوري هند ته د نويو طالب ډېپلوماټانو د معرفي کېدو خبرونه هم رسنیز شول.
د سنډې ګارډین په یوه راپور کې چې د یکشنبې په ورځ خپور شو، ویل شوي و چې نوی ډیلی په پام کې لري له طالبانو سره د ډېپلوماتیکو اړیکو د پراخولو په برخه کې د یوه مهم ګام په توګه په هند کې د دغې ډلې استازی ومني.
د سنډې ګارډین ورځپاڼې د راپور له مخې، طالبانو اکرام الدین کامل ته په ممبیي کې د افغانستان په کونسلګرۍ کې د دویم سکرتر دنده په پام کې نیولې ده.
هندي رسنیو راپور ورکړی، چې په دغه غونډه کې د سوېلي اسیا د مخابراتو د تنظیم کوونکو غړو هېوادونو لکه افغانستان، بنکله دېش، بوتان، هند، ایران، مالدیف، نیپال، پاکستان او سریلانکا استازو ګډون کړی و.
