د افغانستان د هوا پېژندنې ادارې خبر ورکړی چې په ۲۵ ولایتونو کې به درنه واوره وي

په تېرو دوو ورځو کې د افغانستان په اکثرو ولایتونو کې درنه واوره او بارانونه وشول چې د ځینو لویو لارو په ګډون یې د ځینو ولسوالیو لارې هم د تګ راتګ پرمخ تړلي دي.

د واورې له کبله بامیان، غور، غزني او ځینو نورو ولایتونو ته د غځېدلو لورو لارو د بندېدو رپوټونه هم ورکړل شوي چې ځینې یې بېرته د ترافیکو پر مخ پرانستل شوې دي.

په افغانستان کې د وچکالۍ په اړه اندېښنې

په افغانستان کې سږ کال ژمی تر ډېره بې واورې و چې له کبله یې د وچکالۍ په اړه اندېښنې ډېرې شوې دي، خو وروستیو کې د افغانستان ډېری ولایتونو کې ښه ورښتونه شوي. ځینو ولایتونو کې ډېرې واورې ورېدلې او ځینو کې بارانونه شوي.

افغانستان کې د هوا پېژندنې ادارې نن چارشنبه هم لږ تر لږه ۲۵ ولایتونو کې د پراخو ورښتونو اټکل کړی دی.

نور ولولئ:  د هوا د ککړتیا له امله د کابل ښاریانو شکایت

نور ولولئ: د امریکا نظامي اډو د افغانانو صحت او چاپیریال ته پام نه کاوه

نور ولولئ: په افغانستان کې د درنې واورې اورېدو له امله ځینې لارې تړل شوي

د طالبانو حکومت د اوبو او انرژۍ وزارت بیا پرون په یوه خبرپاڼه کې نن او سبا د سېلابونو او د سندونو د اوبو د کچې د لوړوالي خبر ورکړی.

دې وزارت په یوه بیان کې په ځانګړې توګه د هلمند، کابل، کونړ، لوګر، پنجشېر، غزني، پکتیکا، پکتیا او فراه ولایتونو کې د سندونو د اوبود کچې لوړېدو او سېلابونو راوتلو په اړه خبرداری ورکړی.

د ځینو لارو بېرته پرانېستل کېدل

د ورښتونو روانه څپه د سالنګ، بامیان، غور او غزني کې د لویو لاریو د بندېدو لامل شوې ده. د کابل- کندهار لویه لار هم د څه وخت لپاره تړل شوې وه خو بېرته خلاصه شوې ده.

تازه د طالبانو تر واک لاندې باخترخبري اژانس پر اېکس (ټوېټر) لیکلي، “د سالنګ لویه لاره چې دوې ورځې وړاندې د واورو له امله د ترافیکو پر مخ تړل شوې وه، نن سهار بېرته خلاصه شوه. په ورته وخت کې د بامیانو د ټولګټو چارو ریاست ویلي چې د دغه ولایت د ولسوالیو لارې چې د ورښتونو له امله تړل شوې وې، بېرته پرانیستل شوې دي”.

اخوا په افغانستان کې د ژمي لومړنۍ دوې میاشتې (مرغومی او سلواغه) میاشتې نسبتاً د اورښت له مخې کمزوري وې او په ډېرو سیمو کې د وچکالۍ اټکل ډېر شوی و. خو د ژمي وروستۍ میاشت (کب) نسبتاً بیا باراني وه او اورښتونه په کې زیات اټل شوي دي.

د طالبانو تر کنټرول لاندې هوا پېژندنې اداره خبر ورکوي چې دغه میاشت په د افغانستان په اکثرو ولایتونو کې واورې او بارانونه کېږي.

مالدارانو او کرونګر بیا وايي چې که بارانونه ونه شي، نو دوی به راتلونکی کال له زیانونو سره مخامخ شي.