رینا امیري ویلي، د قطر له چارواکو سره یې د افغان نجونو د زده کړو او ا افغانستان د ټیکاو په اړه خبرې کړي دي

رینا امیري داسې مهال له قطري چارواکو سره ګوري چې طالبانو تازه پر افغان ښځو د طبي زده کړو دروازې هم وتړلې او په افغانستان کې ښځې له هر ډول زده کړو او کار منع کړل شوې.

د افغان ښځو، نجونو او بشري حقونو لپاره د امریکا ځانګړې استازې د دوحې فورم د ۲۲مې ناستې په څنډه کې د قطر د بهرنیو چارو وزارت له ځانګړي استازي فیصل بن عبدالله الحنزاب او د دغه هېواد د پوهنې وزیرې لولو الخاطر سره وکتل.

د قطر او امریکا تر منځ نږدې اړیکې

رینا امیري د قطر د بهرنیو چارو وزارت له ځانګړي استازي سره په لیدنه کې د دواړو هېوادونو ترمنځ د نږدې اړیکو او د هغوی د ملاتړ او پراختیا پر لارو چارو او دارنګه په افغانستان کې د ټیکاو د ټینګښت لپاره د نړۍوالو هڅو په اړه خبرې کړې دي.

دا په داسې حال کې ده د امریکا د نړۍوالې پراختیا ادارې او زده کړې د ټولو لپاره په نوم قطري بنسټ چارواکو ویلي، چې د یکشنبې په ورځ یې په افغانستان کې د هغو ماشومانو، نجونو او ځوانانو د زده کړې د ملاتړ لپاره د ۵۰ میلیونو یو تړون لاسلیک کړ چې په افغانستان کې له زده کړو پاتې دي.

نور ولولئ: د امریکا او تاجکستان نوي پرېکړې ته د طالبانو غبرګون

نور ولولئ: رینا امیري: طالبانو ته زموږ صبر نور پای ته رسېږي

دغو دوو بنسټونو د څه باندې سل زره هغو ماشومانو د ثبتولو لپاره چې له درسونو څخه پاتې شوي، په مساوي توګه ۵۰ میلیونه ډالر ځانګړي کړي او نږدې دوه زره ځوانانو ته یې تحصیلي بورسونه ورکړي دي.

په افغانستان کې د نجونو پر زده کړو خبرې

ورته مهال په یوې بلې جلا ناسته کې اغلې امیري د قطر د پوهنې وزیرې سره د افغانستان په روان وضعیت خبرې کړې دي.

په دغه ناسته کې دواړو خواوو د افغانستان په ښوونیزو برخو کې د ګډو همکاریو پر اړخونو او په ځانګړې توګه د نجونو د زده‌کړو او د هغوی له حقونو د ملاتړ او ودې پر لارو چارو خبرې اترې کړې دي.

دا خبرې داسې مهال کېږي او د افغانستان پوهنې لپاره ۵۰ میلیونه ډالر ځانګړې کېږي چې طالبانو د نجونو پر مخ د طبي زده کړو انسټیټیوټونه، د نیمه زده کړو او قابلګۍ روزنیز مرکزونه هم وتړل.