ښاغلي حقانی د صادق خان تر مشرۍ لاندې پاکستاني پلاوي ته ویلي، د پاکستان د داخلي ستونزو پړه دې پر کابل نه اچوي
د افغانستان لپاره د پاکستان ځانګړي استازي صادق خان د طالبانو د کورنیو چارو له وزیر خلیفه سراج الدین حقاني سره لیدلي او ټینګار یې کړی چې د طالبانو او اسلام اباد تر منځ باید ډیپلوماټیکې اړیکې پراخې او شته ستونزو ته د حل مناسبه لار وموندل شي.
یوې سرچینې د نوم نه ښودلو په شرط افغانناو ته وویل، سراج الدین حقاني د پاکستان استازي ته وویل چې له دې وروسته د خپلو ستونزو پړه پر کابل وانچوي.
د پاکستان او افغانستان تر منځ ستونزې
د طالبانو د کورنیو چارو وزیر سراج الدین حقاني د پاکستان ځانګړي استازي صادق خان سره په لیدنه کې د دواړو خواوو ترمنځ د اړیکو د لا ښهوالي او شته ستونزو د حل لپاره پر یو لړ موضوعاتو خبرې اترې کړې دي.
د طالبانو د کورنیو چارو وزارت ویاند عبدالمتین قانع پر اېکس پاڼه د سراج الدین حقاني او د پاکستان ځانګړي استازي صادق خان له لېدنې خبر ورکړی.
نور ولولئ: د پاکستان او طالبانو تر منځ وروستۍ نښته؛ پاکستانی پلاوی کندهار ته تللی
نور ولولئ: د پاکستان پوځ: “ترهګر او د هغوی ملاتړي به له منځه یوسو”
هغه د پاکستان ځانګړي استازي صادق خان په حوالې لیکلي: «موږ ژمن یو، چې د افغانستان او پاکستان ترمنځ شته ستونزې په ګډو هڅو حل کړو، چې د دواړو هېوادونو ترمنځ اقتصادي او ولسي اړیکې لا پیاوړې شي.»
ورته مهال سراج الدین حقاني هم ویلي، اوسنی وخت د دې غوښتنه کوي چې د امنیتي او سیاسي ستونزو د حل لپاره ګډې هڅې چټکې شي؛ چې د دواړو خواوو د ولسونو ترمنځ اړیکې له زیانمنېدو څخه وساتل شي او د سیمې ټیکاو او پرمختګ تضمین شي.
د خلیل الرحمان حقاني د وژل کېدو له امله تسلیت
د دغې لیکنې له مخې، ښاغلي صادق خان په دغې لیدنه کې د خلیل الرحمن حقاني د وژنې په تړاو د پاکستان د لومړي وزیر شهباز شریف، د هغه د مرستیال او د بهرنیو چارو وزیر اسحاق ډار د تسلیت مراتب هم وړاندې کړل.
د افغانستان او پاکستان ترمنځ د ترینګلو اړیکو پر دوام؛ د پاکستان لهخوا افغانستان لپاره د ځانګړي استازي له ټاکل کېدو وروسته دا افغانستان ته د صادق خان لومړی سفر دی.
د افغانستان لپاره د پاکستان ځانګړي استازي صادق خان تر دې وړاندې ویلي و، چې تېره شپه د (مرغومي په څلورمه نېټه) کابل ته رسېدلی او د طالبانو جګپوړو غړو یې هم تود هرکلی کړی دی.
