د طالبانو ویاند ذبیح الله مجاهد وايي، هغه داعشیان چې دایکنډي کې یې مکلي وګړي وژلي، له منځه یووړل
طالبان که څه هم د داعش ډلې د ځپلو او په افغانستان کې د له منځه تلو ادعا کوي، خو کله، ناکله دغه ډله اوس هم په افغانستان ښکاره کوي او عملیات سرته رسوي.
تازه، د طالبانو ویاند ذبیح الله مجاهد پرته له دې چې د داعش ډلې نوم واخلي وایي: «نن ناوخته په غور ولایت کې یوه وحشي او فتنه ګره ډله له منځه ولاړه.» مجاهد پر اېکس خپره کړې اعلامیه کې لیکلي، دا هغه ډله وه چې د غور او دایکنډي ترمنځ یې څه باندې شلو هزاره ګانو ته یې مرګژوبله اوړولې وه.
د المرصاد ورځپاڼې خبر
د احمد تقي په نوم د طالبانو یو غړي پر اېکس خواله رسنۍ د سیف الله سعید مشهور په جواد بدر په نوم د یو کس د انځور په خپرولو سره ویلي، چې هغه په غور کې د داعش سره د جګړې پر مهال وژل شوی دی.
تر دې وړاندې د افغانستان د طالبانو اړوند المرصاد وېبپاڼې د غور ولایت په فېروز کوه کې د داعش ډلې د دوو غړو د وژل کېدو خبر ورکړی و.
نور ولولئ: خلیلزاد: داعش په بلوچستان کې روزل کېږي
نور ولولئ: د طالبانو رژیم: داعش خراسان اوس د پاکستان له بلوچستان او خیبرپښتونخوا فعالیت کوي
نور ولولئ: متقي د مسکو فارمټ ناسته کې؛ سیمه کې د داعش د مرکزونو ایجاد اندېښمن کړي یو
دغې وېبپاڼې وژل شوي کسان د عزیز او مرتضی په نوم یاد کړي او ویلي یې دي، چې عزیز تیره میاشت هغه برید پلان او پلي کړی و، چې په پایله کې یې د دایکنډي او غور ترمنځ ۱۴ ملکي کسان په کې وژل شوي و.
المرصاد په خپل راپور کې د مرتضی په نوم وژل شوی کس بیا بهرنی وګړی یاد کړی دی.
مجاهد بیا زیاته کړې ده، چې طالبانو نن د غور ولایت د مرکز په مارکو سیمه کې د یادې ډلې پر یوه پټنځای عملیات کړی، چې په پایله کې یې د دې ډلې مشر او یو بل مهم غړی وژل شوي دي.
په نورو سیمو کې د داعش ډلې بریدونه
د طالبانو ویاند ذبیح الله مجاهد ویلي، چې یادې ترهګرې ډلې د غور په ګډون په کابل او بامیان ولایتونو کې هم په څو ترهګریزو بریدونو کې لاس درلود.
د نوموړي په وینا، طالبانو له یوې اونۍ راهیسې د دغې ډلې پر وړاندې عملیات پیل کړي و، چې په دغو عملیاتو کې د داعش یو شمېر نور غړي نیول شوي هم دي.
د طالبانو ویاند وایي، چې په دې عملیاتو کې یوه اندازه مهمات، لاسي بمونه او نور چاودېدونکي توکي هم د طالبانو لاس ته ورغلي دي.
مجاهد همداراز وویل، چې د دغې ډلې مشري له بلوچستان څخه کېدله.
د یادولو ده، چې د روان کال د وږي په ۲۲مه نېټه د غور او دایکنډي ولایت په سرحدي سیمو کې د قرودال په کلي کې په یوه خونړي برید کې ۱۴ هزاره وګړي ووژل شول او څلور نور ټپیان شول.
