حکمتیار وايي، طالبانو پر امریکا په ۴۰ میلیون ډالري کڅوړو د افغانستان هوايي حریم پلورلی دی
ګلبدین حکمتیار په تازه څرګندونو کې پر طالبانو نیوکې کړي او ویلي یې دي چې دغه رژیم له امریکا سره معامله کړې او پر امریکا یې د افغانستان هوايي حریم پلورلی دی.
د طالبانو د رژیم لخوا د ده پر ضد له ځینو اقداماتو وروسته، د حزب اسلامي ګوند مشر ګلبدین حکمتیار په لومړي ځل یوه اعلامیه کې پر دغه رژیم ځینې توند تورونه پورې کړي.
افغانان مظبوط اسلامي نظام نه لري
هغه د اختر په مناسب اعلامیه کې پرون ویلي، د بهرنیانو له وتو وروسته افغانانو یو فرصت ترلاسه کړ؛ څو خپلواک، ځواکمن او اسلامي نظام ولري؛ خو په وینا یې چې دې ارمانونو ته په رسېدو کې له خڼد سره مخامخ دي.
حکمتیار زیاته کړې چې افغانستان لا هم خپلواک نه دی، د امریکا ډرون الوتکې د خپلې خوښې بریدونه کوي او حل لاره یې د امریکا سفارت محاصره، د پرسونل او امریکايي وګړو ویستل بللي دي.
نور ولولئ: حبیب الرحمان حکمتیار د طالبانو پر وړاندې؛ تاسو واړه خلک فکر کوئ چې ملت مو فتح کړی
نور ولولئ: ګلبدین حکمتیار: ولسمشر غني د یوې شورا په جوړولو موافقه کړې
نور ولولئ: تازه: ګلبدین حکمتیار وايي، امریکا له طالبانو غوښتي چې د دوحې له تړون سره سم ټولګډونه حکومت جوړ کړي
د حزب اسلامي مشر د امریکا مرستې شيطاني او د زهرو کڅوړې بللې او په وینا یې؛ افغانان او نړۍوال داسې انګېري چې د مرستو په بدل کې د افغانستان فضاء پلورل شوې ده،
نوموړی زیاتوي چې امریکا زموږ پوروړې ده؛ “دا ننگين تور بايد غلط ثابت كړو. امريكا زموږ پوروړې ده؛ د يو مليون افغانانو د وژلو ديت او د افغانستان د ورانولو غرامت بايد ترې وغواړو..”
امریکا د یوې بلې جګړې په لټه کې ده
ګلبدین حکمتیار د پخوانیو پوځي او استخباراتي چارواکو له قوله ویلي چې امریکا بیا راځي او د یوې بلې جګړې په تکل کې ده.
حکمتیار همدا راز وايي چې ګڼ شمېر افغانان چې د امریکا له خوا له هېواده ویستل شوي په بېلابېلو برخو کې استخدام شوي او دا چاره خطرناکه بولي.
د طالبانو رژیم د نوموړي تازه تورونو ته کوم غبرګون نه دی ښودلی.
مخکې د طالبانو عدلیې وزارت په یوه تونده اعلامیه کې د دوی له واکمنیدو وروسته ټول ګوندونه لغوه او له ادرسه یې څرګندونې جرم او غیر قانوني اعلان کړې وې.
یاد شوي وزارت دا هم ویلي وو، چې دوه ګوندونه او یو شمېر ټولنیز سازمانونه له دې پرېکړې د سرغړونې له امله د دوی امنیتي ادارو ته هم معرفي شوي دي.
د طالبانو عدلیې وزارت نږدې یوه میاشت مخکې ګلبدین حکمتیار اړ ویست چې د کابل په دارلامان کې له هغه کور او ملحقاتو یې ووځي، چې د جمهوري نظام لخوا نوموړي ته د سولې په بدل کې ورکړل شوي وو.
د یادونې وړ ده چې حکمتیار له دې وړاندې هم پر طالبانو سختې نیوکې کړي او له دغې ډلې یې غوښتي چې افغانستان کې ټولګډونه حکومت رامنځته کړي.
