افغانستان کې د ملګروملتونو انکشافي اداره(UNDP)  وايي، چې د ښځو د سوداګرۍ او صنعت د خونې په همکارۍ په دوبۍ کې د ۲۶ کوچنیو او متوسطو متشبثو افغان میرمنو د تولیداتو د نندارتون ملاتړ کوي

د ملګروملتونو نوموړې ادارې د چهارشنبې د ورځې ناوخته د مارچ په اتمه چې د کب مياشتې له ۱۷‌مې سره سمون خوري په یوه اعلامیه کې ویلي چې دا نندارتون به د مارچ د میاشتې په ۱۶ مه د دوبۍ د “روتانا ارجان” په هوټل کې دریو ورځو لپاره جوړ شي.

ټاکل شوې په دې نندارتون کې به سوداګریز توکي لکه ګاڼې، قالینې، وچه میوه، لاسې صنایع، د لرګیو مصنوعات او د زعفران تولیدات نندارې ته کیښودل شي.

د ملګروملتونو د انکشافي ادارې د افغانستان د دفتر مسول عبدالله الدرداري ویلي، چې متشبثې میرمنې د خپلو کورنیو د اړتیاوو د پوره کولو لپاره د یو کاروبار د پیلولو پر مهال د خورا زیاتو ګواښونو سره مخ دي.

ښاغلي الدرداري ویلي: “له افغانستان څخه بهر د اړیکو نشتوالی یو له هغو ستونزو څخه دی، چې هغوی ورسره مخ دي. دغه نړیوال نندارتون به لږ ترلږه د هغوی (افغان میرمنو) د ځینو ستونزو په هوارولو کې مرسته وکړي چې وکولی شي نورو بازارونو ته لاس رسی ومومي”.

د ملګروملتونو انکشافي ادارې ویلي چې دغه ۲۶ افغان متشبثو میرمنو نومونه یې د هغو ۳۴ زره ښځو څخه چې د سوداګرۍ په برخه کې ورسره دا اداره همکاري لري د یو پروګرام له مخې غوره کړي دي.

نور ولولئ: کابل کې د تولید، کار او تحصیل تر سرلیک لاندې د نندارتون دایر شوی

ښاغلي الدرداري ویلي: “مونږ دې ته ژمن یو، چې هرې ممکنې لارې دغو متشبثو افغان میرمنو څخه ملاتړ وکړو. د ملګروملتونو انکشافي اداره د ښځو د سوداګرۍ او صنعت د خونې او ښځو سره د مرستې په برخه کې د فعالو غیر دولتي موسسو له لارې په مستقیم د متشبثو افغان میرمنو کاروبار سره مرسته کوي.”

الدرداري زياتوي چې په دوبۍ کې د دغو ۲۶ متشبثو میرمنو سره د نندارتون د پرانیستلو په برخه کې د ملګروملتونو ددغې ادارې دا مرسته افغان متشبثو میرمنو سره د دغې ادارې مرستو یوه برخه ده، چې په افغانستان کې ښځو سره د کوچینو مالي او غیرنغدي مرستو له لارې ترسره کیږي. دغې ادارې ویلي، چې ملګري ملتونه په افغانستان کې تر ۵۰ زرو پورې متشبثو افغان میرمنو ته د دغسې وړو مالي او تخنیکي مرستو د برابرولو پلان لري.

د ښځو د سوداګرۍ او صنعت خونې ویلي، چې متشبثې افغان میرمنې افغانستان کې تل پاتې اقتصادي ودې ته ژمنې دي. دغې خونې ویلي چې اوس مهال ښځې په افغانستان کې د بل هروخت څخه زیات اقتصادي فرصتونو او مالي استقلال ته اړتیا لري او دننه او په بهر کې د نویو بازارنو په پرانیستلو سره د ښځو له کاروبار څخه ملاتړ کوي.

ځینو افغان متشبثو میرمنو د طالبانو په راتګ د خپل کار د زیان په اړه خبر ورکړی

ځینې متشبثې افغان میرمنې وايي، افغانستان کې واک ته د طالبانو د رسیدلو وروسته د دوی کاروبار ډیر زیان لیدلی دی او ځینې کارونه یې بند شوي دي

د کرنې په سکټور کې د متشبثو ښځو د ټولنې موسس ممتاز یوسفزي رسنيو ته ویلي و، چې پر ښځو باندې د طالبانو د حکومت محدودیتونو نه یوازې ښځې له اقتصادي ستونزو سره مخ کړې بلکې ښځو ته یې روحي ستونزې هم پیدا کړې دي.

د ملګرو ملتونو د انکشافي ادارې د اټکل له مخې پر ښځو باندې د طالبانو د حکومت بندیزونه کیدای شي د افغانستان اقتصاد ته تر یو ملیارد ډالرو پورې زیان ورسوي. دا اداره وايي چې دا اندازه د افغانستان د ناخالص کورني تولید پنځه سلنه جوړوي.